O iMac Pro sae á venda o 14 de decembro

Na WWDC de xuño Apple anunciou que en decembro ía pór á venda un novo equipo informático para o ámbito profesional, o iMac Pro, que buscaría suplir a falta de renovación do Mac Pro mediante un iMac de prestacións moi superiores ás dos modelos ordinarios, xa que estará equipado con até procesadores de 18 núcleos, gráficas de 22 TFLOPS e almacenamento de alta velocidade, de xeito que sería un equipo capaz de procesar detallados gráficos tridimensionais en tempo real e crear contidos para a realidade virtual, aínda que a barreira de entrada é bastante elevada, xa que o modelo máis básico venderse a un prezo de 4.999 dólares.
Aínda que o adiamento do lanzamento do HomePod facía temer que o iMac Pro tampouco chegase a tempo para cumprir a data de lanzamento fixada por Apple, finalmente a compañía da mazá confirmou que o novo equipo sairá á venda este xoves, atendendo así a demanda de profesionais que precisan equipos de elevadas prestacións e queren manterse no ecosistema de Apple.
O novo iMac Pro será sen dúbida o equipo máis potente que fixo Apple até hoxe, resultando ideal para desenvolvedores de software, profesionais do vídeo e os gráficos en 3D e, en xeral, usuarios que precisan non só unha grande potencial de cálculo, senón tamén moita memoria (pode equiparse con até 128 GB de RAM e 4 TB de SSD) e unha completa conectividade (os seus 4 portos Thunderbolt 3 permiten conectar 2 monitores 5K, e a súa toma Ethernet pode operar até a 10 Gbps).