O iMac reduce a súa barreira de entrada en 200 euros

mércores, 18 de xuño do 2014 Marcus Fernández

A xeito de sorpresa, a tenda en liña de Apple engadiu un novo integrante da familia iMac, que cunha pantalla de 21,5 polgadas opta por reducir lixeiramente as súas prestacións para reducir o seu prezo en 200 euros, facendo así máis asumibles os ordenadores de sobremesa de Apple, que neste modelo todo-en-un parte agora dos 1.129 euros en vez dos 1.329 euros anteriores.
O novo iMac funciona cun procesador Intel Core i5 de dobre núcleo a 1,4 GHz, 8 Gb de RAM, 500 Gb de disco duro e gráfica Intel HD 5000, mentres o iMac máis económico que había até hai poucas horas partía dun procesador Intel Core i5 de catro núcleos a 2,7 GHz, 1 Tb de disco duro e gráfica Intel Iris Pro.
Coinciden no resto de prestacións: pantalla IPS de 21,5 polgadas cunha resolución de 1.920 x 1.080 píxeles, cámara FaceTime HD, altofalantes estéreo, dobre micrófono, lector de tarxetas SDXC, 4 portos USB 3.0, 2 portos Thunderbolt, saída mini DisplayPort, Gigabit Ethernet, rañura de seguridade Kensington, Wi-Fi N, Bluetooth 4.0, teclado sen fíos e rato Magic Mouse (ou Magic Trackpad).
Entre as súas opcións de ampliación están a posibilidade de equipalo con 16 Gb de RAM e unidade Fusion Drive de 1 Tb ou almacenamento flash de 256/512 Gb.

O novo iMac conserva aparencia externa, pero reduce as súas prestacións para baixar de prezo

PUBLICIDADE