O proxecto de aldeas intelixentes de Medio Rural vén con 5 millóns de euros
mércores, 24 de novembro do 2021
Este
24
de novembro desenvolveuse en Santiago a xornada de lanzamento da
consulta preliminar ao mercado do proxecto Aldeas intelixentes,
solucións de futuro para aldeas sustentábeis, iniciativa de
compra pública de innovación impulsada pola Consellería do Medio
Rural cun orzamento de partida de 5 millóns. Na apertura do foro
participaron o conselleiro José González, e directora xeral de
Desenvolvemento Rural, Inés Santé. No acto avogaron pola
transformación sustentábel, intelixente e tecnolóxica dos núcleos
do rural para que sigan sendo “as nosas aldeas de sempre”.
O
dito proxecto é unha iniciativa da Consellería do Medio Rural que
persegue “obter solucións innovadoras para impulsar a recuperación
dos núcleos rurais”. Máis polo miúdo, o obxectivo é “conseguir
un territorio rural galego intelixente a través da creación dunha
rede de aldeas modelo que potencien os grandes valores das áreas
rurais e proporcionen aos actores locais as ferramentas para
aproveitar o seu potencial e así contribuír aos grandes retos como
a seguridade alimentaria ou o asentamento da poboación no rural,
entre outros aspectos”.
O
conselleiro referiuse á necesidade de continuar incidindo en
tecnoloxías disruptivas como por exemplo a que permite conectar
obxectos entre si e xerar e compartir información: a Internet das
Cousas. Este tipo de recursos, dixo, teñen potencial para xerar
“calidade de vida, mercado laboral e máis e mellores servizos”,
ao tempo que afianzan o mellor dos alicerces para un regreso ao rural
de poboación e de empresas. O conselleiro defendeu esta consulta
pública como o modo máis transparente e proactivo de buscar as
sinerxías necesarias a prol dese crecemento dende o rural.
Nun
plano máis concreto, González remarcou que este ano xa se comezou a
traballar na elaboración do plan de dinamización de tres aldeas
piloto: Muimenta (Carballeda de Avia), Penedo (Boborás) e Osmo
(Cenlle), e ao longo de 2022 empezarase co seu desenvolvemento. Así
mesmo, lembrou que en Galicia hai actualmente 14 aldeas modelo
declaradas, das cales tres delas xa están en funcionamento e están
destinadas a gandaría en extensivo con razas autóctonas.
O
proxecto presentado conta cun orzamento inicial superior aos 5
millóns de euros de fondos propios, que a Xunta espera poder ampliar
con outras fontes de financiamento vinculadas a Next Generation UE ou
ao programa FID do Ministerio de Ciencia e Innovación para acadar un
orzamento global próximo aos 15 millóns de euros. Búscase
conseguir entre 15 e 20 ideas ou solucións innovadoras que teñan un
orzamento aproximado de cincocentos mil a un millón e medio de
euros.