O puxante tecido innovador galego darase cita o 16 de decembro en Innovames

venres, 2 de decembro do 2022 S. P.

O Concello de Ames e Maker Faire Galicia organizan unha nova edición de Innovames, unha xornada de innovación para as empresas de Ames que terá lugar o 16 de decembro no Pavillón Polideportivo do Milladoiro e na que se contará coa presenza de grandes referentes da innovación que conviven no concello. O obxectivo deste evento, salientaron as entidades organizadoras, é “poñer en valor os recursos e a capacidade de innovación local, fomentando a sinerxía e a colaboración entre as empresas e dando a coñecer ao público xeral o capital empresarial de Ames”.
Programa do evento
Charlas e mesas de debate que versan sobre a tecnoloxía, a innovación, o audiovisual e a utilización de novos materiais conforman o groso dunha programación que na súa sesión matinal estará dirixida non só ao sector profesional, se non tamén aos centros escolares de Ames coa finalidade de proporcionar referentes profesionais e laborais, así como fomentar a inquedanza pola innovación nas novas xeracións.
Deste xeito, o alumnado dos centros de ensino e representantes de empresas poderán escoitar a Carlota Corzo, unha das 30 mozas e mozos con menos de 30 anos da lista Forbes, co-fundadora de Lázaro, unha empresa que axuda a organizacións sen ánimo de lucro a crear plataformas web fiables, permitindo traccionar as súas operacións mediante tecnoloxías Blockchain.
Nesta xornada contarase ademais cun programa centrado na presenza de diferentes representantes das empresas asentadas en Ames e na súa contorna, como Airvision, Tecalis, Escenoset, Mirabelle Comunicación, Verial, Nanogap, Sistemius Abogados, FlowReserve, Grupo Altia, Carto Galicia, Ficción Producciones, Minervas Voice (Zenit), Conic Vascular, Alfonsin Digital Lab ou We Robot, entre outras firmas, que ofrecerán a súa visión particular do estado da innovación dentro dos seus diferentes sectores. Tamén se contará con representantes das tres universidades galegas.
En concreto, a empresa Airvisión mostrara os seus drons; Minervas Voice dará voz ás mulleres que, coa súa obra, contribuíron e contribúen de forma decisiva na evolución da humanidade e ao empoderamento feminino; e Alfonsin Digital Lab presentará as singularidades da posprodución máis innovadora, traballando man a man cas plataformas audiovisuais do momento.
Premios InnovAmes
Este ano como novidade o Concello de Ames convoca a primeira edición do Premio Innovames para empresas innovadoras co obxectivo de “recoñecer, apoiar e dar visibilidade ás persoas emprendedoras e empresas máis innovadoras e con maior potencial de crecemento en Ames; proxectos con carácter e innovador e de gran impacto social, tanto de recente creación como xa consolidadas”. Premiarase a innovación, o impacto social e o alto potencial de crecemento.
Ademais, convócase o I Premio InnovAmes para proxectos educativos.
Espazo de exposición
Tamén haberá un espazo de exposición no que os asistentes poderán coñecer de primeira man estes proxectos e outros exemplos innovadores nos que traballan as empresas do concello de Ames, así como os proxectos presentados polos centros educativos. Así mesmo, durante a mañá os escolares poderán asistir a diversos obradoiros, previa inscrición.
O evento completarase cunha sesión de tarde, dirixida ás empresas e ao público interesado, na que se poderá escoitar a Alfonsín Digital Lab, unha das poucas empresa de postprodución cinematográfica en España que traballa con coñecidas plataformas audiovisuais. Coñeceranse os proxectos presentados polas empresas amesás e farase entrega dos premios aos/ás gañadores/as. O público poderá asistir a diversos obradoiros durante a tarde e como punto final da xornada gozarase dun espectáculo e poderanse degustar uns petiscos.

PUBLICIDADE