Ofrenda a la Tormenta estrearase directamente en Netflix

O confinamento por mor da COVID-19 tivo un grande impacto no calendario cinematográfico mundial, con filmes que adiantaron a súa estrea en dixital e incluso producións que optaron por estrearse directamente en dixital, como Trolls 2: Gira Mundial, que converteuse nun éxito sen precedentes (levando a que se insinuase que no futuro podería ser normal a estrea simultánea en cines e en plataformas dixitais de aluguer baixo demanda), e aínda que parecía que o cine español permanecería alleo a este fenómeno, sorprenden anunciando que Ofrenda a la Tormenta, a última entrega da triloxía do Baztán, estrearase en exclusiva o 24 de xullo en Netflix, plataforma na que El Guardián Invisible e El Legado de los Huesos chegaron a liderar as reproducións en España.
Ofrenda a la Tormenta tiña previsto estrearse en cines o pasado 27 de marzo e chegou a publicarse que a súa estrea tería lugar o 12 de xuño, pero nesa data aínda non estará normalizada a situacións das salas de exhibición, que están a abrir paulatinamente e a apostar por completar os filmes que tiñan en cartel antes do confinamento con clásicos como Los Goonies, Origen ou a triloxía de películas de Batman dirixidas por Christopher Nolan, dando a impresión de non querer queimar estreas con sesións con aforamentos restrinxidos considerablemente.
A estrea en dixital da produción protagonizada por Marta Etura será interesante por ver como reaccionará o público español ante un fenómeno deste tipo, que previsiblemente podería disparar a popularidade das anteriores entregas en Netflix por parte de espectadores que saben que poderán ver en breve o peche da adaptación da triloxía literaria de Dolores Redondo.