Oliver y Benji estrearán xogo para Nintendo DS

O pasado 20 de maio chegou ás tendas niponas o videoxogo para Nintendo DS Captain Tsubasa: Gekito no Jiseki, que celebra o 30 aniversario da serie de animación coñecida en España coma Campeones (ou Oliver y Benji), e que durante a celebración da Japan Expo de París confirmaron que chegará ao mercado europeo antes de rematar o ano, o que agradecerán os seguidores destas aventuras futbolísticas que tanto éxito tiveron na pequena pantalla.
O xogo ten coma título oficial en occidente Captain Tsubasa: New Kick Off e permite rememorar a etapa moza de Ozora Tsubasa/Oliver Atom, xogando os Campionatos Nacionais e os Campionatos Internacionais, aínda que agocha interesantes sorpresas coma un modo de xogo de preguntas e respostas na que hai que demostrar os coñecementos sobre a serie orixinal (manga e anime), un modo que pasaría se… no que o xogador pode crear a súa propia historia dentro da saga e incluso a posibilidade de xogar ata 4 usuarios á vez mediante Wi-Fi. Non faltan as recreacións das técnicas que tiñan os distintos xogadores, de xeito que os máis fieis a esta franquía gozarán ao ver o tiro con efecto de Oliver Atom, o tiro do tigre de Mark Lenders ou a catapulta infernal do xemelgos Derrick, tal e coma podemos ver no vídeo promocional do xogo: