Os Premios Spin-Off Puntogal 2020 terán un xurado cen por cen feminino
venres, 25 de setembro do 2020
A
organización dos Premios Spin-Off PuntoGal, que teñen o prazo para
a presentación de candidaturas até o 30 de setembro, anunciou os
días pasados os nomes das integrantes do xurado que se encargará de
valorar as candidaturas das empresas e grupos de investigación que
participan nesta cuarta edición dos galardóns. Será
un xurado cen por cen formado por mulleres, representantes femininas
da investigación científico-tecnolóxica da nosa terra e, tamén,
da puxante innovación empresarial galega.
Trátase
de Edita de Lorenzo, investigadora do Centro AtlantTIC (UVigo) e
profesora na Escola de Enxeñaría de Telecomunicación da
Universidade de Vigo; Sonia Martínez Arca, directora da empresa
Sigillum Knowledge Solutions; María José Rodríguez Malmierca,
responsábel da Área de E-learning e Colaboración do Centro de
Supercomputación de Galicia (CESGA); e Carme Pampín, unha das
fundadoras e actual directora executiva da empresa Galchimia,
referente internacional en química orgánica. Xunto a elas tamén
participará Faustino Infante Roura, xefe de servizo de Planificación
e Estruturación Universitaria da Xunta de Galicia.
Como
dixemos no seu día dende Código Cero, o pasado verán, a cuarta
edición dos Premios
Spin-Off PuntoGal diríxese a recoñecer as mellores e máis
innovadoras iniciativas empresariais xurdidas no ámbito das tres
universidades galegas. Estes galardóns son herdeiros dos Premios
Galicia Spin-Off, que en anos anteriores xa premiaron a destacados
proxectos empresariais realizados en Galicia.
Nesta
nova edición, os premios recoñecerán o labor desenvolvido polas
empresas e os grupos de investigación das universidades galegas en
tres apartados diferentes. O obxectivo é recoñecer a transferencia
de coñecemento entre a Universidade e a Empresa e alentar o
emprendemento que xurde desde os grupos de investigación
universitarios. A Secretaria Xeral de Universidades da Xunta e Gadis
colaboran nestes galardóns.
No apartado Selo de Calidade
recoñecerase á empresa galega que teña consolidado ao longo do
tempo una traxectoria empresarial de prestixio. Nas anteriores
edicións dos premios foron distinguidas neste apartado compañías
coma Imatia, Galchimia ou Innolact.
As empresas que irrompesen
nos últimos meses no mercado cunha idea ou proxecto de marcado
carácter innovador serán recoñecidas no apartado Idea Emerxente.
Noutras edicións dos premios acadaron este galardón compañías tan
destacadas coma Situm, All Genetics e HG Beyond.
Na edición deste ano introdúcese unha novidade
coa nova categoría que recoñecerá o traballo dun grupo de
investigación dependente dalgunha das tres universidades galegas.
Para a concesión deste premio, o xurado terá en conta aspectos coma
as innovacións obtidas, os proxectos emprendidos, as publicacións
realizadas e o grao de colaboración con empresas.
Os finalistas
e gañadores nas distintas categorías daranse a coñecer antes do 30
de outubro e o acto de entrega de premios celebrárase nos últimos
meses de 2020.