Os concursos de preguntas en directo vía móbil fracasan en España e EE.UU.

A posibilidade de participar en directo en concursos dende o móbil cun formato moi televisivo e con premios reais foi a proposta de HQ Trivia que converteuse en todo un fenómeno nos EE.UU., e que en España quixo replicar Q12 Trivia, pero estas iniciativas non conseguiron manter o seu pulo inicial como para facer os seus negocios rendibles a longo prazo, e agora estamos vendo como esmorecen.
Por unha banda temos que Q12 Trivia leva un tempo fóra de servizo, con acumulacións de impagamentos a gañadores do concurso e coa promesa incumprida de volver á actividade a primeiros de xaneiro. Temos así que un xogo que conseguiu superar os 100.000 xogadores simultáneos durante o seu apoxeo non conseguiu captar investidores que puidesen dar continuidade a este atractivo proxecto que prometía ser un adianto do futuro dos concursos televisivos.
Cómpre salientar que non só é complicado atraer patrocinadores e anunciantes a un formato revolucionario, senón que tamén resulta moi complicado manter o interese do público a longo prazo, non resultando realista confiar en acaparar 10-15 minutos de centos de milleiros de persoas a diario, polo que resultaría precisa unha renovación constante e grandes investimentos para ter reclamos que manteñan a atención.
Pero as dificultades de Q12 Trivia non son específicas de España, e dende CNN Business están a dar conta de que HQ, a compañía detrás de HQ Trivia, está a pechar as súas portas, despedindo aos seus 25 empregados a tempo completo.
Aínda que HQ Trivia conseguiu captar millóns de dólares en campañas promocionais e compras dentro da aplicación, para poder manterse precisaba de investimentos adicionais que non foi capaz de conseguir (ao que habería que sumar feitos como o pasamento dun dos seus fundadores).
Os fracasos de Q12 Trivia e HQ Trivia non implican que estes modelos de negocio non sexan sustentables, senón que poderiamos estar simplemente ante unha mala xestión das compañías, ou á falta de madurez do mercado publicitario nos ámbitos en liña, polo que non deberiamos desbotar que no futuro outras compañías consigan ter un grande éxito con iniciativas semellantes.