Os participantes de VíaGalicia presentaron en Lugo os seus proxectos innovadores
venres, 22 de xaneiro do 2016
Lugo reunía hoxe aos
emprendedores da zona norte de Galicia no marco do programa de
aceleración ViaGalicia, que conta con dúas sedes, unha en Vigo
e outra (por primeira vez nesta edición) en Lugo, xestionada dende a
Fundación CEL- Iniciativas por Lugo. A xornada de hoxe -Demo Day
Lugo- acollía a vinte proxectos empresariais que superaron xa
varias fases de preselección e selección (inicialmente
presentáronse 309 candidaturas entre Lugo e Vigo). Logo dun período
de formación ou academia, entran agora na recta final de ViaGalicia,
na que compiten con outros vinte proxectos da sede de Vigo, que
celebrará unha xornada de demostración (Demo Day) mañá,
para optar a unhas das quince prazas da fase final de aceleración,
que terá lugar nunha única sede (o Centro de Negocios de Porto do
Molle en Nigrán, Pontevedra).
Nesta última fase, os
quince proxectos emprendedores seleccionados (que se darán a coñecer
o 29 de xaneiro) recibirán unha contribución financeira de até
125.000 euros, dos que 75.000 serán achegados pola Xunta a través
da Axencia Galega de Innovación e Xes Galicia, e os outros 50.000
polo Consorcio a través da sociedade de capital-risco Vigo Activo.
Indo á Demo Day Lugo
(#DemoDayLugo) de hoxe, cómpre dicir que os emprendedores
tiveron a posibilidade de expor ante o comité técnico avaliador,
entidades colaboradoras e observadores pertencentes ao ecosistema
emprendedor, o seu proxecto a través dunha breve presentación ou
pitch. A sesión prolongouse ao longo de toda a mañá,
dividida en dúas roldas de presentacións e un peche final no que se
lles fixo entrega dun diploma acreditativo da súa participación na
fase de academia de ViaGalicia.
Engadir
por último que dende a Fundación CEL salientan a grande dificultade
á hora de elixir gañadores, pois o talento emprendedor da zona
norte en Lugo resultou “de dez” para eles. Asemade, tamén é
preciso subliñar a variedade das propostas, vinte proxectos que hoxe
se someteron á avaliación de ViaGalicia, entre eles hai: un
comparador en liña de perfumaría e cosmética; unha ferramenta para
preparar as oposicións online;
unha plataforma para servizos domésticos; outra plataforma
especializada en formadores; proxectos de produción de queixo
artesán ou de produción e comercialización de algas; unha moblería
artesanal; unha plataforma de fotografía histórica; un proxecto de
produción de embrións bovinos in
vitro; un proxecto de deseño e
fabricación de trikes
reclinados; unha solución para smart
homes ou mesmo un proxecto de
elaboración de produtos con fariña de castaña. Para obter máis
información cómpre visitar as webs da Fundación
CEL e de ViaGalicia.