Os recursos formativos en galego de Esenciais USC, dispoñíbeis en liña

venres, 9 de decembro do 2022 S. P.

JPEG - 96.4 KB
Recursos de coñecemento da USC para o alumnado nunha imaxe de Santi Alvite

Os corenta títulos que integran a colección Esenciais USC, escolma recursos cos que a Universidade de Santiago sintetiza materias para acompañar ao alumnado no proceso de aprendizaxe dos contidos, xa poden consultarse en aberto a través da Libraría Dixital da USC. Esenciais pretende ser “un recurso que sirva para apoiar o traballo do profesorado e a comunidade de estudantes nos seus diferentes papeis”, explican fontes da USC, engadindo que esta colección naceu como “ferramenta que permita achegar o galego á docencia”.
Segundo explica o Servizo de Normalización Lingüística da Universidade de Santiago, impulsor da iniciativa, esta abéirase ao Obxectivo de Desenvolvemento Sustentábel 4, que aspira a garantir unha educación inclusiva, equitativa e de calidade e promover oportunidades de aprendizaxe durante toda a vida para todos. Os Esenciais permitiron dende 2019 “mellorar a comunicación lingüística en galego no eido científico na universidade, así como transmitir información veraz e crear materias válidos para o Ensino Secundario e para o eido profesional como pode ser o SERGAS”, informan, engadindo que os capítulos da colección “conforman un resumo executivo do curso con información veraz e contrastada fronte a fontes dixitais non verificadas”.
Deste xeito, os corenta títulos que poden ser lidos en liña ou descargados en formato PDF constitúen recursos condensados do saber que conteñen o esencial dunha materia. A colección arrincou en 2019 cunha proposta piloto ao que paulatinamente foron sumándose títulos ata chegar ata ese medio cento que agora pasa a estar dispoñíbel en aberto.

PUBLICIDADE