Ourense acollerá o evento Mobile Week nos anos 2021, 2022 e 2023
mércores, 30 de xuño do 2021
Este
29 de xuño a Deputación de Ourense formalizou un acordo histórico
para o fortalecemento da provincia no panorama internacional do
ámbito tecnolóxico. En concreto, o
presidente Manuel Baltar, asinou co CEO de Mobile World Capital
Barcelona, Carlos Grau, un convenio para celebrar o evento Mobile
Week en Ourense nos anos 2021, 2022 e 2023. Será “un evento de
referencia mundial no sector tecnolóxico e que terá a Ourense como
protagonista”, dixo, Baltar. O acordo formalizouse no marco do
Mobile World Congress 2021.
O
presidente da Deputación tamén se reuniu coa directora de Digital
Future Society e responsábel de Mobile Week, Cristina Colom, e con
representantes de Red Mundo Atlántico, para ultimar a celebración
do dito acontecemento tecnolóxico en Ourense, que se vai desenvolver
na provincia galega por primeira vez (e durante tres anos
consecutivos), ofrecendo un espazo no que participar activamente dos
cambios que traen as novidades tecnolóxicas, así como formar nas
habilidades profesionais para o futuro.
O
convenio sinala que, co fin de trasladar o modelo de éxito da Mobile
Week, porase especial esforzo en involucrar no evento á contorna
académica, universidades, centros de investigación e centros
académicos de referencia; así como ao tecido social, colectivos,
asociacións, fundacións, artistas, científicos, pensadores e
emprendedores, e ao sector privado, empresas, startups,
espazos de innovación, tecnolóxicos e profesionais do sector.
A
edición de 2021 da Mobile Week Ourense celebrarase do 19 ao 23 de
novembro. A Deputación comprométese a organizar, producir e
promover o evento, traballando de forma conxunta con entidades
representativas do territorio do tecido económico, social, académico
etc. para promover a xeración de sinerxías e dar a máxima difusión
ao evento. Pola súa banda, MWCapital prestará asesoramento en
materia de contidos e organización co obxectivo de contribuír ao
correcto desenvolvemento da cita tecnolóxica.