Ozona desenvolverá o proxecto cloud do Consello Xeral do Poder Xudicial
luns, 7 de decembro do 2015
Ozona
Tecnoloxía, firma galega especialista en servizos de
virtualización e de computación na nube, vén
de resultar adxudicada para o desenvolvemento da plataforma para o
intercambio cloud de ficheiros do Consello Xeral do Poder
Xudicial. A notificación desta entidade foille achegada á
empresa o pasado 18 de novembro e nela comunícaselle a encarga de
dar forma aos servizos de almacenamento seguro e accesíbel que
permitan acubillar a través de Internet a documentación xerada polo
Sistema de Xestión de Comisións da devandita entidade xudicial,
como lembraremos un órgano colexial que ten entre as súas funcións
principais a de garantir a independencia dos xuíces no exercicio da
súa función.
Segundo reflicte o
Clúster TIC, plataforma da que forma parte Ozona, o dito Conxello
Xeral requiría para o seu Sistema de Xestión de Comisións “dun
sistema de almacenamento na nube que permitise o acceso á
documentación desde calquera emprazamento, minimizando a
posibilidade de erro dos sistemas de Consello e aumentando o período
de atención ante incidencias cubrindo o período 24X7, 365 días ao
ano”.
Como lembraremos, Ozona
foi recoñecida recentemente pola multinacional de virtualización
Citrix como socia referencial en Europa. Este premio distinguiu o
traballo que a compañía vén desenvolvendo nos últimos anos
xerando novos proxectos e abrindo novos horizontes para a tecnoloxía
de Citrix. Precisamente, segundo engade o Clúster, a tecnoloxía de
Citrix constitúe o alicerce do proxecto a desenvolver para a dita
entidade xudicial.