PREDIF e Vodafone reuniron a 50 profesionais do eido turístico no seu curso de accesibilidade
venres, 4 de outubro do 2013
Celebrouse finalmente en
Compostela, no Centro Superior da Hostalaría de Galicia, a
actividade formativa que anunciamos hai uns días en Código Cero
e que se dirixiu a achegar fórmulas e metodoloxías entre os nosos
profesionais do sector do turismo no camiño dunha meirande
accesibilidade a tódolos niveis, tanto física como virtual. Máis
polo miúdo, o que se pretende é que o noso tecido hostaleiro
perfeccione a atención ás persoas con diversidades funcionais. O
curso forma parte do convenio subscrito entre PREDIF (Plataforma
Estatal de Persoas con Discapacidade Física), Fundación Vodafone
España e o Real Padroado sobre Discapacidade, desenvolvéndose baixo
o seguinte epígrafe: Turismo accesíbel e atención ao cliente
con discapacidade ou outras necesidades diversas.
A actividade contou coa
presenza do xefe da área de Xestión de Calidade de Turgalicia,
Enrique Pérez, que recoñeceu que a accesibilidade no turismo é
sinónimo de calidade. Asemade, explicou que ao fío disto Turgalicia
elaborou a Guía de aloxamentos accesíbeis de Galicia, na
que se detalla toda a oferta de establecementos adaptados para
viaxeiros con este tipo de características físicas e
motrices e que inclúe, en galego e
en castelán, en papel ou descargábel en pdf a través de
turgalicia,es, un total de186
aloxamentos destas características distribuídos por toda a
xeografía galega.
O curso tamén contou coa
presenza de Xulio Castro, director do Parador Nacional de Santiago,
que explicou como desde esta entidade traballan na xeración de
produtos turísticos adaptados a través do desenvolvemento do Plan
de Accesibilidade Universal de Paradores, posto en marcha no ano
2006. Ademais, o responsábel do Departamento Vacacional de Viaxes
2000, Emilio Martínez, indicou que aproximadamente o 50% das vendas
da axencia proceden da organización de viaxes adaptados para persoas
con diversidades funcionais, polo que salientou en que o turismo
accesíbel “é unha oportunidade de negocio”.
O curso, de dous días de
duración, contou coa participación de 50 profesionais do sector
turístico (restaurantes, aloxamentos, oficinas de turismo, empresas
de turismo activo), e representantes de distintas administracións
públicas locais. Durante o mesmo, os participantes experimentaron en
primeira persoa a falta de adaptación de infraestruturas e servizos
a través dunha actividade práctica na que puideron manexar unha
cadeira de rodas ou desprazarse con antefaces e bastóns guía,
mentres percorrían o Centro Superior de Hostalaría de Galicia e a
súa contorna. Tamén aprenderon a empregar ferramentas para realizar
o autodiagnóstico de accesibilidade dos seus establecementos que
lles servirá para ofrecer a información aos seus clientes de forma
obxectiva.
Como dixemos, o curso
forma parte do convenio subscrito por PREDIF coa Fundación Vodafone
España e o Real Padroado sobre Discapacidade, cuxo obxectivo é
contribuír á normalización do lecer e o turismo para as persoas
con discapacidade a través da formación.