Pontevedra activa un sistema propio de xeorreferencia
martes, 26 de xaneiro do 2021
O
Concello de Pontevedra está a dar os últimos retoques este mes de
xaneiro a un sistema propio de información xeográfica para todo o
territorio local. A ferramenta, que estará activa e a
disposición do público desde a páxina web municipal nas vindeiras
semanas, reúne xa información da cartografía, do catastro, da
distribución da poboación e do rueiro e as vías de comunicación,
entre ouros elementos.
Trátase,
segundo explicou na súa presentación a concelleira Anabel Gulías
“dun traballo moi ambicioso” realizado desde diversos servizos
municipais e coordinado polo departamento de Informática, e que
permitirá “facer os datos municipais accesíbeis para que todo o
mundo poida empregala e tirarlle partido, garantindo rapidez e
inmediatez”.
O
técnico encargado de desenvolver o proxecto, Santiago Pérez Agra,
explicou que este sistema mestura datos de fontes propias e doutras
procedentes da comunidade de Internet, como por exemplo Open Street
Maps, que no caso de Pontevedra “ten identificadas e xeolocalizadas
as sendas e vías peonís da cidade permitindo obter a ruta óptima
de tránsito entre dous puntos da cidade”. Tamén explicou que este
sistema permite acceder a todo o rueiro da cidade e núcleos de
poboación das parroquias, á información catastral ou mesmo a
“mapas de calor” que recollen a distribución e densidade da
poboación.
Tamén
achegará un vieiro directo a diferente información xeorreferenciada
da cidade como composteiros, semáforos, paradas de taxi, lombos e
redutores de velocidade, a liña de autobuses ou o trazado do Camiño
de Santiago.
De
cara a o futuro está previsto que se incrementen os puntos
xeorreferenciados e se inclúan equipamentos como por exemplo os
parques infantís ou os centros de ensino. As persoas usuarias deste
sistema tamén poderán percorrer as vías e as sendas da cidade a
través das fotografías 360º realizadas no ano 2018 ao abeiro dun
proxecto no que se fotografou toda a cidade desde un vehículo.