Preto de cen persoas formáronse xa na academia galega Emprende Makers

A firma compostelá Vermislab, especializada en formación, divulgación e desenvolvemento de novas ferramentas abertas e creativas, acolleu este mércores 7 de decembro a visita da directora xeral de Emprendemento e Apoio ao Emprego, Margarita Ardao. Fíxoo para coñecer polo miúdo a actividade xerada na academia maker de Vermislab e para facer balance do programa Emprende Makers, iniciativa formativa co-organizada pola Xunta (xunto coa UVigo, o Concello e a Deputación de Ourense, entre outras entidades galego-portuguesas) na que xa participaron preto de cen persoas e que se apoia directamente no modelo de desenvolvemento empresarial baseado no “faino ti mesmo”.
Ardao sinalou que a academia Emprende Makers foi impulsada polo Goberno galego para “democratizar a transformación dixital, potenciar a formación e o intercambio de coñecementos e para favorecer a creación de empresas innovadoras impulsadas pola mocidade”, indicou, engadindo que a cultura maker constitúe “un activo crucial para a sociedade” e “para o seu tecido empresarial e industrial, ao aportar innovación e reinventar a actividade empresarial usando tecnoloxías creativas e colaborativas de fabricación dixital”.
O programa, que está financiado ao 75% no marco do Programa Operativo de Cooperación Transfronteriza España-Portugal 2014-2020, permitiu desenvolver accións nos polos de emprendemento de Verín (Ourense Sur), Silleda (Pontevedra Norte e Rías Baixas), Coristanco (Costa da Morte) e no centro de desenvolvemento local de Vilanova de Arousa (Pontevedra), que chegaron a 98 persoas usuarias que adquiriron coñecementos para aplicar ás súas ideas de negocio.