PuntoGal celebra o Nadal coa súa última promoción para 2022
venres, 9 de decembro do 2022
A
Asociación PuntoGal está a celebrar a chegada do Nadal, na compaña
do Apalpador, cunha importante promoción destinada a facilitarnos a
obtención dun dominio galego. De feito, a promoción consiste “nunha
atractiva rebaixa no prezo dos novos dominios”, sinalan dende a
asociación. En concreto, a través desta campaña nos rexistradores
sumados a esta promoción poderemos o obter o noso .gal por un prezo
máximo de 10 euros máis IVE. Estes prezos rebaixados estarán
vixentes desde o día 12 e ata o 29 de decembro.
Dende
PuntoGal explican que “para poder aproveitar a promoción de
desconto nos prezos do .gal que trae o Apalpador”, é preciso
dirixirse ás empresas rexistradoras Blacknight, Arsys, Dinahosting,
INWX, CDMon, Openprovider, Radia e OVH.com, que ofrecen distintas
políticas de prezos e servizos con rexistro de dominios novos.
PuntoGal recomenda visitar todas as páxinas das empresas
participantes na promoción e atopar a que se adapte mellor ás súas
necesidades.
“Dende
PuntoGal, que xa superamos os 6.700 dominios rexistrados, seguimos a
traballar para que todas aquelas persoas, asociacións, institucións
e empresas que queiran visibilizarse na Rede como parte da comunidade
galega poidan facelo cun prezo competitivo”, explican dende a
asociación, engadindo que esta campaña centrada na figura do
Apalpador foi redeseñada por Xoana Pousa, creadora multidisciplinar
coruñesa formada en Belas Artes, coñecida tamén como Cuchiflainas
polo seu proxecto de roupa, accesorios e ilustración.
Máis
actividades recentes
O
dominio continúa co seu programa corporativo de apoio a iniciativas
relacionadas coa lingua, a cultura e as TIC en Galicia. Entre as
últimas actividades realizadas figura o patrocinio dos VII Premios
Paraugas, que recoñecen as mellores estratexias de creatividade,
deseño, edición, industria gráfica, mercadotecnia e comunicación,
ou os VI Premios Spin-Off PuntoGal, que distinguen a transferencia de
coñecemento entre a universidade pública e a empresa e alentan o
emprendemento que xorde desde os grupos de investigación.