R fai medrar a cifra de domicilios e negocios de Gondomar que contan coa súa fibra óptica

A operadora R vén de incrementar a cantidade fogares e negocios de Gondomar con posibilidade de conectarse á súa fibra óptica FTTH (tecnoloxía de fibra até o fogar). Os núcleos de Antime, Bade, Raposeira, Rasas, Sequeiros, Batizosa, Guillufe, Gulfar, Picouso e Viño, no termo municipal pontevedrés, xa dispoñen de accesos ultrarrápidos a Internet de ata 500 Mbps e poden desfrutar doutros servizos avanzados de telecomunicacións grazas ás redes de nova xeración de R. O despregue destes equipamentos levouse a cabo “aproveitando ao máximo as infraestruturas destes núcleos de Gondomar”, segundo fixo saber a compañía.
O devandito tradúcese en que a día de hoxe 448 novos fogares e negocios destes lugares do municipio pontevedrés estean xa preparados para recibir os servizos avanzados de teléfono, Internet de ata 500 Mbps simétricos e televisión dixital multicanle de R.
Cando remate o plan, en 2021, esa cifra será de 2.000 unidades inmobiliarias conectadas.
O operador galego leva anos investindo no fornecemento de rede en Gondomar, onde a día de hoxe xa dispoñen da cobertura das redes de nova xeración de R un total de 1.713 fogares e empresas deste municipio da provincia de Pontevedra.
Este e outros despregues na provincia de Pontevedra forman parte dun dos tres proxectos do Plan PEBA-Avanza do Ministerio de Economía e Empresa dos que R resultou adxudicataria en 2018 para despregar, antes de 2021, a tecnoloxía FTTH en 512 núcleos de Galicia que non dispuxeran de alta velocidade ata o momento (“zonas brancas”).
No desenvolvemento dos tres plans investiranse un total de 10 millóns de euros, dos cales preto de 8 millóns de euros serán subvencionados polos fondos FEDER da Unión Europea. En concreto, o despregamento de Gondomar encádrase no proxecto destinado á extensión de redes de nova xeración en 196 núcleos de municipios do suroeste de Galicia (Pontevedra). Os fornecementos tecnolóxicos nestas zonas suporán un investimento total de 3,75 millóns de euros, cunha subvención dos fondos FEDER de máis de 3 millóns de euros.