Rede Aberta dotará de Internet de alta velocidade a 36.556 fogares e empresas da Coruña
luns, 17 de outubro do 2022
A
operadora neutra galega Rede
Aberta anunciou este luns 17 de outubro un importante despregue
de fibra óptica até o fogar (tecnoloxía FTTH) na provincia da
Coruña, que terá un relevante impacto nunha chea de concellos do
rural, que contarán con máis e mellores oportunidades para
dixitalizárense, coller impulso económico e produtivo e fixar
poboación. Segundo fixo saber a empresa, esta levará a dita
tecnoloxía a 36.556 fogares da Coruña, tras a adxudicación do
programa Único Banda Larga 2022 do Goberno central (Ministerio de
Asuntos Económicos e Transformación Dixital).
A
medio prazo, a previsión é que ao final de 2024 a cobertura chegue
a máis de 155.000 fogares da provincia con conexión de Internet de
alta capacidade. “A resolución do Ministerio”, sinalaron fontes
da operadora, “suporá un importante pulo para a nosa estratexia de
conectar as zonas rurais con infraestruturas dixitais de moi alta
capacidade, con velocidades superiores aos 100 Mbps”.
A
día de hoxe, a firma ten en marcha un plan de despregadura para
chegar a 192.000 fogares en toda Galicia no bienio 2023-2024.
A
adxudicación do Plan Único na Coruña suporá un investimento de
26,6 millóns de euros, dos que 13,3 están financiados polo
Ministerio de Asuntos Económicos con fondos do Plan de Recuperación
para lograr o obxectivo da Axenda Dixital 2026: que o 100% da
poboación teña acceso a conexións dixitais superiores aos 100 Mbps.
As
actuacións de Rede Aberta despregaranse en “zonas brancas” da
provincia coruñesa, ou sexa, as que non dispoñen de cobertura de
redes de velocidade de polo menos 30 Mbps, nin plans para a súa
dotación no próximos tres anos.
Presente
en medio de cento de municipios rurais
Rede
Aberta, que acaba de cumprir os dous anos de actividade no mercado,
está xa presente en 49 municipios rurais de Galicia, poñendo en
xogo unha infraestrutura de máis de 1.300 quilómetros de cable
tendido para dar servizo de fibra óptica neutra e chegando a máis
de 100.000 fogares.
Na
provincia da Coruña, Rede Aberta iniciou a actividade en 26
municipios, nos que ten previsto ofrecer a conexión a 77.435
fogares. Na actualidade, xa alcanzou o 79% dos obxectivos, con 61.360
fogares con conexión de fibra de moi alta capacidade.
Nalgunhas
comarcas, como é o caso de Costa da Morte, concentrou os seus
esforzos en municipios como Cabana de Bergantiños, Cee, Corcubión,
Laxe, A Laracha, Malpica, Ponteceso e Vimianzo, onde xa foi quen de
superar os 18.500 fogares conectados, que representan o 53,7% dos
34.422 previstos en toda a comarca. Nalgúns deles, debido á
demanda, superáronse as previsións iniciais, como é o caso de
Corcubión, onde se duplicou a cifra de fogares conectados. Rede
Aberta explicou que nestes municipios a cobertura de banda larga de
moi alta capacidade “non chegaba ao 50% da poboación, o que viña
supoñendo unha diminución nos seus dereitos dixitais e nas súas
posibilidades de desenvolvemento económico e vital”.
Apoio
importante
A
adxudicación da despregadura de Único na Coruña supón un “apoio
importante aos plans da compañía”, segundo explicou Pere
Antentas, director executivo (CEO) de Rede Aberta. Así, apuntou que
ten previsto investir 121 millóns ata 2025 para chegar a 400.000
fogares e incrementar os servizos de fibra escura, housing e
ethernet VPN para as empresas, sobre todo, aquelas que desenvolven a
súa actividade no ámbito rural. Ademais, lembrou que Rede Aberta
puxo en marcha o pasado 9 de setembro a tecnoloxía XGS-PON en
Chantada (Lugo), que permite a conexión a 10 Gbps, e que se
estenderá a outras comarcas nas que desenvolve a súa actividade. “O
compromiso de Rede Aberta é erradicar a fenda dixital con fibra de
alta capacidade para que todos os cidadáns e empresas de Galicia
teñan as mesmas oportunidades e dereitos sen importar o lugar de
residencia”.