Remember Me retrasa o seu lanzamento ao mes de xuño

mércores, 27 de febreiro do 2013 Marcus Fernández

O xogo cyberpunk de Capcom Remember Me promete ser un dos grandes xogos do presente ano para PC, Xbox 360 e PlayStation 3, ofrecendo unha ambientación futurista que resultará coñecida para os amantes de tal xénero, nun ano 2084 no que unha cazadora de memoria de elite loitará para recuperar a súa propia memoria tras ser arrestada e detida polas autoridades (borrando os seus recordos). A protagonistas, Nilin, destacará pola súa habilidade do combate, garantindo unha acción trepidante que será o seu prato forte, aínda que a nivel argumental tampouco quedará mal.
Este xogo está a ser desenvolvido polo estudo parisiense Dontnod, que vén de anunciar xunto a Capcom que finalmente non poderán cumprir co obxectivo de estrear este agardado título no mes de maio, adiando o lanzamento europeo ao 7 de xuño.

Este xogo de Capcom destacará polas súas mecánicas de combate
A acción transcorre en Neo-Paris, contorno que será unha delicia para os amantes do cyberpunk




Último trailer de Remember Me

Portada do xogo na súa versión para Xbox 360

PUBLICIDADE