Ribeira, proposta oficialmente como Concello Emprendedor Doing Business
luns, 9 de xullo do 2018
O termo municipal de
Ribeira vén de ser proposto
oficialmente como novo Concello Doing Business Galicia – Concello
Emprendedor. A iniciativa, feita pola Xunta e a Federación Galega de
Municipios e Provincias (FEGAMP), ten o obxectivo de salientar,
visualizar e recoñecer a calidade e a cantidade de recursos o
municipio coruñés para acubillar proxectos innovadores de mercado.
Esta proposta compleméntase coa entrada en vigor (o 19 de xuño) das
novas bonificacións fiscais recollidas nos impostos sobre bens
inmóbeis (IBI), actividades económicas (IAE) e construcións,
instalacións e obras (ICIO), iniciativas todas elas compartindo o
mesmo obxectivo: achandar o camiño dos novos proxectos empresariais.
A proposta a prol do
recoñecemento de Concello Emprendedor foille notificada á
Administración local despois de que na sesión da comisión técnica
encargada do seguimento desta iniciativa celebrada o 22 de xuño, se
acordase propoñer a habilitación da devandita distinción por
“cumprir cos requisitos esixidos no correspondente protocolo”.
Respecto das vantaxes
fiscais ás que teñen dereito agora os empresarios que se animen a
emprender no municipio ribeirense (base, en parte, do dito
recoñecemento), cómpre sinalar que atinxen ao IBI (ao abeiro do cal
fíxase unha bonificación de ata o 95% da cota íntegra do imposto a
favor de inmóbeis urbanos nos que se desenvolvan actividades
económicas que sexan declaradas de especial interese ou utilidade
municipal por concorrer circunstancias de fomento do emprego), ao IAE
(que vén cunha bonificación de até o 95% da cota correspondente) e
ao ICIO (que tamén inclúe rebaixas de até o 95% sobre o imposto a
favor das construcións, instalacións ou obras que sexan declaradas
de especial interese ou utilidade municipal por concorrer
circunstancias sociais, culturais, histórico artísticas ou de
fomento do emprego que xustifiquen tal declaración).
Doing Business
En abril deste ano a
listaxe de concellos aspirantes a integrarse na rede Doing Business
estaba formada por máis dun centenar de administracións, sendo 47
os concellos finalmente recoñecidos con tal distinción (o primeiro
dos cales foi o de Ourense). O programa, deseñado para favorecer a
captación de investimentos empresariais, é froito dun convenio
marco para a captación de investimentos asinado pola Xunta de
Galicia e a Federación Galega de Municipios e Provinciais. Os
Concellos Doing Business, en virtude desta iniciativa, están en
capacidade de achegar máis incentivos fiscais, meirande
simplificación administrativa e máis facilidades de acceso a solo
empresarial para empresas de nova creación.