SAPPHIRE presenta un pequeno ordenador ideal para agochalo tras o televisor

venres, 1 de xullo do 2011 Marcus Fernández

A tecnoloxía que empregan os ordenadores ultraportátiles de baixo custo goza de certa sona en equipos domésticos para o seu uso como dispositivos orientados á reprodución multimedia, polo seu reducidos tamaño, consumo e ruído, e SAPPHIRE Techonogy segue a avanzar neste tipo de ordenadores e presenta agora o SAPPHIRE EDGE-HD2, que en só 19,3 x 14,8 x 2,2 centímetros e 530 gramos de peso encerra un equipo completo cun procesador Intel Atom D525 a 1,8 GHz, 2 Gb de RAM, 320 Gb de disco duro, gráfica nVIDIA Ion 2 con 512 Mb de memoria dedicada, Gigabit Ethernet, Wi-Fi N, saídas VGA e HDMI e 4 portos USB, que sería capaz de correr vídeo en alta definición sen problemas.
Entre os seus accesorios inclúe cable HDMI, adaptador de HDMI a DVI, un soporte para manter o equipo en vertical e un sistema de ancoraxe estándar para facilitar a súa instalación na parte traseira dun televisor ou monitor.
Este equipo ten un consumo máximo de 65 W, aínda que por termo medio consumiría menos de 30 W, ou sexa, ata 20 veces menos que un ordenador de escritorio ordinario. Aínda que a súa configuración de referencia inclúe o sistema operativo FREE DOS, é posible adquirilo con Windows 7 Ultimate preinstalado, deixando claro que é capaz de operar como un ordenador completo para labores ofimáticas ou para acceder á Internet. Polo momento non se coñece o seu prezo de venda.

PUBLICIDADE