Samsung desenvolve baterías para portátiles con enerxía para un mes

mércores, 3 de xaneiro do 2007 Fernando Sarasketa

O modelo de portátil Q35 de Samsung

A principal razón de ser dos computadores portátiles, que é precisamente a súa portabilidade, vén de recibir un importante pulo da man de Samsung, empresa de tecnoloxía que asegura ter desenvolvido unha batería que subministra enerxía todo un mes e sen necesidade de achegármonos a unha toma de corrente.
Segundo se di en CanalPDA (facéndose eco de informacións do xornal coreano Chosum Ilbo), a batería en cuestión está deseñada para o equipo portátil Q35 e –como dixemos– non precisaría achega de enerxía sempre e cando non nos pasemos de oito horas ó día de funcionamento e cinco días á semana (que xa está ben).
A tecnoloxía empregada é a de célula de combustible DMFC (Direct Methanol Fuel Cell) e que consiste en aproveitar a enerxía que se desprende do paso do metanol á auga. A xuízo da firma Samsung e en contra do que se poida pensar, estaríamos a falar dun proceso limpo que non xera contaminantes como metais pesados e (atención) nin risco algún de estoupido (como as baterías máis tristemente famosas de Dell).

PUBLICIDADE