Samsung presenta un par de móbiles de gama media moi completos

mércores, 15 de marzo do 2023 Marcus Fernández

Samsung presentou hoxe os novos Galaxy A54 5G e Galaxy A34 5G, smartphones que ofrecen unha magnífica experiencia de uso e unhas cámaras moi competentes para fotografía e vídeo sen ter un prezo excesivo e podendo presumir dunha batería capaz de superar os 2 días de duración. Ambos móbiles contan con pantallas Super AMOLED optimizadas para facilitar o seu uso a plena luz do sol, e cunha velocidade de refresco de 120 Hz. Tamén gozan de conectividade 5G e prometen actualizacións de sistema operativo durante 4 xeracións e 5 anos de actualizacións de seguridade, o que garante unha longa vida destes smartphones.

O Galaxy A34 5G pode adquirirse en 4 cores distintas

O Samsung Galaxy A54 5G presenta unha pantalla Full HD+ de 6,4 polgadas, 8 GB de RAM, 128/256 GB de almacenamento, cámara traseira tripla cun sensor principal de 50 Mpíxeles, cámara frontal de 32 Mpíxeles (nunha perforación en pantalla), batería de 5.000 mAh e carcasa dispoñible en 4 cores diferentes.
Pola súa banda, o Samsung Galaxy 34 5G ten unha pantalla Full HD+ de 6,6 polgadas, 6/8 GB de RAM, 128/256 GB de almacenamento interno, cámara traseira tripla cun sensor principal de 48 Mpíxeles, cámara frontal de 13 Mpíxeles (integrada nunha pestana superior), batería de 5.000 mAh e carcasa dispoñible en 4 cores diferentes.
Ambos móbiles chegarán ás tendas oficialmente o vindeiro día 31, partindo o Galaxy A34 5G dos 399 euros e o Galaxy A54 5G dos 499 euros.

PUBLICIDADE