Telefónica quere cubrir con fibra óptica, para 2025, a totalidade de España
xoves, 30 de xullo do 2020
Telefónica
anunciou este 30 de xullo un ambicioso plan para dotar de fibra a
totalidade do territorio estatal e situarse como “líder” en
fornecemento ás familias e empresas de tecnoloxía 5G. Estas
e outras medidas estratéxicas figuran na súa proposta para un Pacto
Dixital, que xorde co obxectivo de ser “a folla de ruta para a
dixitalización das pemes, os autónomos e as administracións
públicas”. Tamén se dirixe a romper as desigualdades do mundo
dixital, a fomentar o acceso á conectividade de nova xeración e a
protexer os dereitos humanos fronte ás ameazas tecnolóxicas.
En
termos concretos de despregues tecnolóxicos, Telefónica
comprométese nesta proposta a “facer o maior dos seus esforzos
para impulsar a dixitalización completa de España”, o que se
traducirá, como dixemos, no compromiso de cubrir con fibra óptica,
en 2025, o cento por cento do territorio estatal, e en converterse en
“líder na implantación da tecnoloxía 5G”.
Con
este Pacto Dixital, Telefónica lanza a seguinte mensaxe: “Non
abonda con adaptarse ao cambio, senón que hai que anticiparse e
liderar esta profunda transformación”.