Toshiba amosa un portátil con pantalla 21:9

Nas tendas hai tempo que vemos impresionantes televisores con pantallas en formato cinematográfico como o Philips Cinema 21:9, pero tal proporción de pantalla que é habitual no cine non parecía útil para outros usos, de aí que soprenda o portátil Toshiba Satellite U840W que conta cunha pantalla 21:9 de 14,4 polgadas cunha resolución de 1.792 x 768 píxeles. Esta característica que nun principio só serviría para ver películas sen bandas negras pode que teña certa utilidade con Windows 8, sistema operativo que permitirá partir a pantalla para empregar 2 aplicacións en paralelo.
Este equipo estaría dentro da categoría de Ultrabook, cun procesador Ivy Bridge, ata 10 Gb de RAM, disco duro ou unidade de estado sólido (de xeito que o equipo pesaría 1,8 ou 1,6 quilos respectivamente), altofalantes Harman Kardon, porto Ethernet, saída HDMI e 3 portos USB 3.0. A súa batería durará unhas 8 horas e verémolo nas tendas nun par de meses a prezos que poderían partir duns 1.100 euros.