Un adaptador USB-Lightning adopta forma de chave para facilitar o seu transporte

Mentres a meirande parte dos smartphones empregan actualmente un conector micro USB para recargar a súa batería, os usuarios de dispositivos móbiles de Apple empregan uns conectores diferentes, o que dificulta que no caso dunha emerxencia poidamos ter a alguén ao noso redor cun cargador compatible, de aí que a empresa californiana Nomad Goods prepare o lanzamento dunha curiosa solución: ChargeKey, un adaptador de conector Lightning a USB que adopta a forma dunha chave, para que poidamos levalo comodamente con nós no chaveiro, de xeito que para cargar o iPhone 5 ou o iPad 4 só sexa preciso ter un porto USB a man.
Este novo accesorio sairá á venda o 30 de novembro a un prezo de 25 dólares (18,73 euros) e serve tanto para realizar cargas de ata 3.1 amperes e sincronizar os dispositivos por USB 2.0.
A mesma compañía tamén ten á venda as súas ChargeCard, adaptadores con forma de tarxeta de visita (para facilitar o seu transporte na carteira) que xa está dispoñible para conectores micro USB e para o iPhone 4/4S, e que a mediados do mes que vén tamén contará con versión para iPhone 5.