Urbanismo en Rede fai a súa parada obrigada en Vigo
martes, 23 de xuño do 2009
A Coruña, Abegondo,
Lugo e agora tamén Vigo, son as localidades galegas que, na súa teima por
introducirse de cheo na Sociedade da Información e poñer a disposición dos seus
veciños e veciñas todo tipo de ferramentas tecnolóxicas que faciliten a comunicación coa administración
local, adheríronse xa ao programa Urbanismo
en Rede, dos Ministerios de Industria e Vivenda.
A última destas
cidades en incorporarse á iniciativa, Vigo, fíxoo esta mesma mañá, da man de Delfín
Fernández Álvarez, subdelegado de Goberno en Pontevedra, María Fernández
Rancaño, xerente de Administración Electrónica de red.es e Julia Chamosa
Martín, xerente de Urbanismo do Concello de Vigo, os cales, entre outros
representantes de entidades relacionadas coa xestión urbanística de Galicia,
presentaron o Programa Urbanismo en red perante os alí presentes.
Durante a xornada,
tamén participou Oscar Luís Peña Sánchez, xefe de Planeamento da Área de
Urbanismo do Concello de A Coruña, quen explicou a experiencia do seu municipio
como un dos primeiros en poñer en marcha o programa.
Urbanismo en rede é froito dun convenio marco entre os Ministerios de Industria e de Vivenda
para a incorporación das TIC no ámbito urbanístico municipal con un triple
obxectivo: dar resposta a unha demanda social de transparencia (mediante a
publicación por Internet dos plans urbanísticos), fomentar a interoperatibilidade
entre administracións (a través de servizos web) e mellorar a eficiencia na
xestión introducindo ferramentas que faciliten a operativa dos técnicos
municipais.
A
iniciativa, que prevé un investimento de 57 millóns de euros para o periodo
2009-2012, permite que os cidadáns poidan consultar a información urbanística
da súa cidade de maneira doada, rápida e intuitiva, a través de Internet. Por
outra parte, permítelle aos concellos ofrecer información actualizada do
planeamento urbanístico vixente en cada momento, así como levar a cabo a
vectorización e sistematización do planeamento urbanístico, a posta en marcha
do equipamento e as aplicacións informáticas que dan soporte á explotación e
visualización da información e a capacitación dos técnicos municipais.
Vantaxes para os cidadáns
Grazas a esta nova ferramenta, os vigueses poderán obter información
urbanística de forma inmediata e personalizada a través da páxina web do
Concello. A nova aplicación permite acceder á información de dúas maneiras:
facendo clic directamente sobre o mapa na zona que desexen ou
introducindo datos concretos referidos ao planeamento do seu interese: distrito
postal, referencia catastral, código urbanístico, coordenadas físicas ou o nome
da zona a consultar.
A web mostraralle ao usuario todos os niveis de información dispoñibles sobre a
parcela ou área do seu interese: clasificación, categorías do planeamento e
calificación do chan, e permitiralle descargar a ficha urbanística completa.
Asemade, a información compleméntase con outros datos de grande utilidade como
a información catastral e novas funcionalidades que se irán engadindo
paseniñamente.