VIA porá á venda un mini-ordenador con Android a só 49 dólares

mércores, 23 de maio do 2012 Marcus Fernández

O fabricante taiwanés VIA Tecnologies vai comezar a vender por 49 dólares (38,90 euros) en xullo unha plataforma chamada APC e que permitiría termos un pequeno e económico ordenador baseado en Android (optimizando a súa distribución para funcionar axeitadamente cun teclado e un rato). Este sistema basearíase nun procesador WonderMedia ARM 11 sobre unha placa Neo-ITX de só 17 x 8,5 centímetros e cun consumo medio de só 4 vatios (podendo chegar ata 13,5 varios a máxima potencia), incluíndo entre as súas características 512 Mbytes de memoria RAM, 2 Gb de memoria Flash ampliable mediante tarxetas microSD, Fast Ethernet, 4 portos USB 2.0, saída de son e entrada de micrófono, saídas VGA e HDMI, soporte de televisión en alta definición e aceleración de hardware para os formatos de vídeo máis habituais, polo que estamos ante unha plataforma de hardware que serviría tanto para achegar a Internet ao televisor como para montar ordenadores de baixo custo. De feito, a placa Neo-ITX pode montarse en carcasas Mini-ITX ou micro-ATX, de xeito que os amantes da bricolaxe informática atoparán no APC un produto moi interesante para xogar.


Vídeo de presentación do APC de VIA

Co APC podemos construír un ordenador completo cun tamaño moi reducido

PUBLICIDADE