VOU Axenda, a aplicación sobre a vida cultural de Ourense, acadou xa 1.000 descargas
xoves, 24 de abril do 2014
A
aplicación galega VOU
Axenda, unha ferramenta participativa para estarmos ao tanto de
todo o que acontece (cinema, música, teatro, exposicións, eventos
deportivos e infantís,
lecer, feiras)
en Ourense, está a acadar importantes cifras de seguimento. Así
nolo contan hoxe os responsábeis do desenvolvemento desta app,
que acadou xa o fito das 1.000 descargas dende
o mes de xaneiro.
Esta cifra, engaden, “consolida á nosa plataforma como a mellor
axenda para consultar a actividade cultural da cidade das Burgas en
cernes da celebración da Capitalidade Cultural do Eixo Atlántico”.
A aplicación en cuestión acadou
na tenda Google Play unha puntuación de 4,7 sobre 5. Nas procuras co
termo Ourense, aparece en primeiro lugar.
As
devanditas
1.000 descargas,
por certo, coinciden co número de usuarios rexistrados no sitio web
do servizo (vouaxenda.com),
un milleiro de usuarios, incluíndo promotores, bandas, salas de
concertos, empresas, fundacións e cidadáns. Por outra banda, os
creadores da axenda en liña sinalan que a día de hoxe, xa se
difundiron dende a axenda máis de 6.000 actividades dende a súa
data de lanzamento. A aplicación, dispoñíbel polo de agora para
Android, ten o seu complemento e acubillo na devandita páxina web,
que recolle e informa dende 2011 a oferta cultural de Ourense.
Como
dixemos, a app
informa de todo tipo de actividades de lecer e faino, en palabras do
seus creadores, “dun xeito intuitivo e sinxelo, facilitando o
filtrado por tipo de evento, lugar ou data no calendario”. Ademais,
posibilita que compartamos as actividades cos nosos contactos nas
redes sociais incluíndo aplicacións como Whatsapp ou Telegram.
Segundo engaden, o contido da aplicación e da web é colaborativo, e
dende a plataforma permítese aos usuarios
e promotores subir o que queiran engadir á axenda, amosándose
pouco despois tanto na
axenda en liña como na app.
Estas
ferramentas, unidas á celebración da
Capitalidade Cultural do Eixo Atlántico, están
a acadar que medre o interese por Ourense na Rede e nas canles 2.0,
axudando a consolidar a cidade galega, informan os responsábeis de
VOU Axenda, “como destino
turístico e cultural, cousa
que se viu confirmada os días pasados coas importantes cifras de
visitas rexistradas durante a celebración de Semana Santa”.