Vitae ofrécenos en outubro a 3ª edición do seu curso de Clean Code Avanzado (principios do deseño)
martes, 20 de setembro do 2022
Chega
o outono e nada mellor que retomar o fío da formación e a
innovación que se cadra algúns de nós deixamos esquecido co inicio
do verán. Vitae Consultores segue a ser un referente óptimo neste
ámbito da capacitación continua, achegando propostas como a
terceira edición do seu Curso Clean Code Avanzado: principios e
patróns de deseño. Celebrase en formato de aula virtual os días
17, 19, 24 e 27 de outubro. Trátase dunha oportunidade inmellorábel
para afinar instrumentos e metodoloxías en materia de
desenvolvemento, desprendéndonos de todo aquilo que poida escurecer
a claridade, a sinxeleza e a eficacia dos nosos produtos
tecnolóxicos. Serán 12 horas de formación.
O
miolo da actividade son os beneficios que reporta a un profesional a
práctica do bo deseño. “Un bo deseño axúdanos sempre a crear bo
software, ou sexa, programas doados de manter a longo prazo”,
destacan dende Vitae, engadindo que se ben a análise e o deseño de
arquitecturas limpas son sen dúbida tarefas complexas, non parten
dende cero: “Podemos mellorar a nosa produtividade e calidade dos
nosos produtos aplicando principios fundamentais e patróns de deseño
xa probados. Os obxectivos do curso son os seguintes: por unha banda
coñecer os principios fundamentais da programación robusta e, pola
outra, aplicar os patróns de deseño máis axeitados durante o
desenvolvemento.
O curso está dirixido principalmente a
programadores con experiencia nalgunha linguaxe orientada a obxectos.
Terá unha duración de 12 horas cun “enfoque eminentemente
práctico”. A persoa encargada de impartir os contidos será
Alberto Basalo, enxeñeiro técnico en Informática con dúas décadas
de experiencia como analista programador, xefe de proxectos e
formador en pequenas e grandes empresas. Basalo é, a día de hoxe,
socio director de AgoraBinaria e consultor asociado a Vitae
Consultores.