Youtubeiras 2021 centrarase na difusión e na formación en liña
luns, 5 de xullo do 2021
A
edición 2021 de Youtubeiras xa está collendo corpo, cun programa de
actividades que vai poñer no foco na difusión e na formación en
liña. Baixo o lema Magnetismo en liña, esta iniciativa de
dinamización lingüística (destinada a converter o Youtube e outras
redes sociais nunha fonte inesgotábel de audiovisuais na nosa
lingua) repartirá un total de 7500 € en premios. Unha vez máis, o
certame vén da man dos servizos de normalización lingüística dos
concellos da Baña, Ames, O Grove, Moaña, Ourense, Pontevedra,
Ribadeo, Rianxo, Santiago e Teo, das universidades da Coruña,
Santiago e Vigo e da Deputación da Coruña.
Haberá
doce categorías, segundo informou estes días o Concello de Rianxo,
engadindo que o certame estará aberto a todas as persoas maiores de
14 anos con canles de Youtube en galego, autoproducidas e que teñan
polo menos cinco vídeos publicados con data posterior ao 23 de
outubro de 2020.
O
prazo de inscrición abrirase o 10 de setembro e as
bases deste ano pódense consultar xa na web do concurso.
Os
Premios Youtubeiras, que teñen como finalidade concreta “ser
acicate da creación en Youtube con temáticas e formatos diversos
así como promover e mostrar as youtubeiras e youtubeiros en galego”,
ofrecerán unha serie de sesións formativas para procurar a mellora
da calidade técnica dos vídeos, por unha banda, e, pola outra, para
dotar as persoas creadoras de ferramentas globais para a súa
actividade. Deste xeito, a formación será nesta quinta edición
máis especializada que en anos anteriores.
Primar
as canles
Nesta
quinta edición dos Premios Youtubeiras, a organización quere
“fomentar a creación e o mantemento de canles”, polo que neste
2021 só se poderán presentar canles e non vídeos illados como en
anos anteriores. Esa, de feito, será a gran novidade nas bases
destes quintos Premios Youtubeiras que, por segundo ano consecutivo,
artéllanse en 12 categorías: canle, vídeo, youtubeir@, calidade
lingüística, impacto, calidade técnica, comunicación,
creatividade, musical, didáctico, pioneiro e premio do público. Os
tres primeiros acompañaranse cunha dotación económica de 1.000
euros, mentres que os nove restantes chegarán aos 500 euros.
Un
xurado profesional escollerá as propostas premiadas, agás no caso
do premio do público. Neste apartado, os/as seguidores/as serán
quen propoñan os seus vídeos preferidos para concorrer neste
apartado. As suxestións poderanse facer só a través do formulario
habilitado na páxina web do
proxecto, cumprirán cos mesmos requirimentos das bases xerais e
realizaranse antes do 22 de outubro de 2021.