A Deputación de Pontevedra debate este xoves sobre as vocacións STEM no marco de Ciencia en feminino

A Deputación de Pontevedra debate este xoves 14 de marzo sobre as vocacións no marco de Ciencia en feminino, o programa de podcast e vídeo-podcast que promove xunto a GCiencia para reivindicar o papel da muller nas ciencias e na investigación.
Alicia Bruzos, bióloga especializada no cancro en animais mariños; Uxía García, primeira doutora aeroespacial da Universidade de Vigo; e Blanca Moncunill, paleontóloga na Universidade da Coruña, serán as encargadas de abrir este programa xunto á deputada provincial Sandra Bastos. Ciencia en feminino poderase seguir a través de GCiencia e das súas plataformas de Facebook e Youtube, así como a través de Google Podcasts, Spreaker, Spotify, IHeart, Deezer, Podchaser e Apple Podcasts.
Esta iniciativa, que promove a Deputación de Pontevedra ao abeiro da campaña Seguimos con todas e para todas deseñada para conmemorar o Día Internacional das Mulleres, ofrecerá en total dúas charlas coloquio e dúas conferencias que afondarán, entre outras cuestións, nas vocacións femininas, o emprendemento na ciencia, a investigación no estranxeiro ou os teitos de cristal. Así, ademais desta primeira charla-coloquio, centrada nas vocacións femininas, terá lugar outra o 4 de abril para abordar cuestións relacionadas coa investigación no estranxeiro. Neste caso daranse cita Raquel Lama, investigadora sobre a viroloxía molecular dos peixes en Francia; Cristina Lazcano, investigadora sobre o cambio climático en California; e Carmen Figueiras, investigadora sobre a gripe en Londres.
No que respecta ás conferencias, a primeira delas terá lugar o 21 de marzo e terá como protagonista a Catalina Fernández de Ana Portela, bióloga e directora executiva de Hifas da Terra, que afondará no emprendemento feminino no ámbito científico. O broche de ouro do programa será o 11 de abril a cargo de Begoña Vila, astrofísica especializada no estudo de galaxias que traballa como enxeñeira de sistemas na NASA que se centrará nos teitos de cristal na ciencia e a tecnoloxía.