A USC, entre as universidades con mellor taxa de transferencia de coñecemento
martes, 17 de setembro do 2019
A
Universidade de Santiago vén de obter un importante recoñecemento
ao seu pulo innovador, á súa capacidade para beneficiar ás
empresas cos seus achados e á súa excelencia educativa. Segundo
se desprende do último ránking sobre as universidades
españolas que vén de publicar a Fundación CYD (no que se recollen
datos do conxunto de España, por comunidades e universidades), a
USC mantense entre as institucións académicas superiores con mellor
taxa de rendemento nos eidos da investigación e transferencia de
coñecemento, no que atinxe a concesións de patentes, ingresos por
licencias, publicacións interdisciplinares e internacionais, así
como en captación e liquidación de fondos.
Na
elaboración deste estudo están incluídos datos de 73 universidades
públicas e privadas ao tempo que se analizan resultados de 23
ámbitos de coñecemento e 2.522 titulacións.
O
citado traballo sitúa a institución académica compostelá entre as
universidades españolas con máis publicacións con impacto
internacional e tamén no grupo de cabeza das institucións con máis
investigacións citadas en patentes e tamén entre as que captan máis
ingresos por licencias. Estes tres parámetros empregados pola
Fundación CyD para a elaboración da súa listaxe proban, en
palabras da institución compostelá, “o compromiso e o bo facer da
USC en canto a transferencia do coñecemento á sociedade se refire”.