A veciñanza de Ames colaborou co Concello para identificar as eivas locais en fibra óptica
mércores, 6 de abril do 2022
O
Concello de Ames quere saír ao paso dos desafíos tecnolóxicos que
deixou a pandemia, unha crise que, segundo lembran fontes do
Consistorio, acelerou as demandas de teletraballo e fixo medrar o
número de trámites en liña, amais de modificar as metodoloxías
docentes. En base a isto, o Concello solicitou a colaboración
veciñal para “coñecer o estado actual do despregue de fibra
óptica no municipio”. O obxectivo foi “coñecer aquelas zonas
que na actualidade non dispoñen de fibra óptica”. Fontes do
Consistorio recoñecen que durante o prazo aberto para recadar
información sobre dito asunto, recibiuse
“unha importante cantidade de queixas respecto da demora existente
na implantación da fibra óptica en diferentes lugares do
municipio”.
O
alcalde de Ames, Blas García, explicou que “nos últimos tempos
observamos con preocupación que moitas das nosas veciñas e veciños
non contan cun servizo esencial como é poder dispor dunha conexión
a Internet de calidade, e día a día vemos como nos trasladan á
Administración local, a máis próxima á cidadanía, a necesidade
de esixir ás institucións competentes unha maior implicación para
conseguir que a fibra óptica chegue aos seus fogares o máis axiña
posíbel”.
O
rexedor manifestou que na actualidade non se alcanzaron os obxectivos
fixados nos diferentes mapas publicados pola Secretaría de Estado de
Telecomunicacións, onde se informa das zonas grises e brancas para
os anos 2020 e 2021. Concretamente en Ames, para o ano 2020 estaba
previsto a implantación de fibra en distintos núcleos nos cales,
aínda na actualidade non existe o servizo como son: Vilaverde,
Balindo, Fernande, Covas e Rúa, pertencentes á parroquia de
Piñeiro; Vilouta, Frenza e A Mámoa da parroquia de Tapia; Ínsua, O
Galiñeiro e Trasmil da parroquia de Agrón; e Biduído de Abaixo.
“Acontece
o mesmo nas previsións para o ano 2021”, explicou o alcalde,
engadindo que “tampouco se cumpriron as previsións establecidas
pola Secretaría de Estado”. Neste momento, continuase sen servizo
nos seguintes lugares: Calo, na parroquia de Agrón; O Portanxil, na
parroquia de Trasmonte; Urbanización Alto do Vento, na parroquia de
Covas; Aldea Nova e contorna; en diferentes partes de Castrigo, das
rúas Rosaleda, Lodeiro, Paraxe do Porto, pertencentes á parroquia
de Ortoño, e nunha parte do lugar de Coira, na parroquia de Biduído.
Por mor destas eivas, García solicitou “celeridade nas actuacións
dirixidas a dotar de fibra óptica os distintos núcleos do municipio
amesán”, e instou a “que cumpran o establecido nos plans de
actuación da Secretaría de Estado de Telecomunicacións, tendo en
conta a importancia deste servizo na actualidade, máxime nun
concello como o de Ames, que ten a particularidade de ser o máis
novo de Galicia, con todo o que iso implica”.