Ampliado o prazo para participar no hub contra a soidade non desexada da Deputación de Pontevedra
luns, 15 de xaneiro do 2024
A
Deputación de Pontevedra amplía o prazo ata o vindeiro 15 de
febreiro para presentar solicitudes para
participar como alumna ou alumno ou influencer no programa Hub
para a loita contra a fenda dixital e a soidade non desexada no rural
da provincia de Pontevedra, que se desenvolve nos concellos
da Illa de Arousa, As Neves, Cuntis, Forcarei e Moraña. O programa
inclúe unha formación destinada a persoas maiores de 50 anos para
alfabetizalas dixitalmente e capacitalas en competencias dixitais co
fin de facilitar as súas relacións coas administracións públicas.
As e
os interesados en participar nesta iniciativa como alumnos deberán
ser nacidos antes de 1973 ou acreditar unha discapacidade, prestar
servizos de axuda a domicilio ou ter a condición de persoa coidadora
con maiores a cargo, sempre que sexan maiores de 18 anos. No caso das
e dos influencers (persoas destacadas a nivel municipal e con
capacidade de mobilización e influencia sobre outras grazas á
demostración en primeira persoa dos beneficios que lles pode achegar
o uso de ferramentas sociais), deben ser maiores de 18 anos e estar
empadroados nalgún dos concellos participantes.
Unha
vez seleccionadas as persoas participantes, cincuenta en cada
concello, desenvolveranse sete accións formativas, que versarán
sobre a Administración Electrónica, o SERGAS en liña, a banda
móbil, as redes sociais ou a creación de vídeos. Cada acción
formativa terá unha duración de 5 horas e, ao final delas, haberá
un servizo de titorías, dun mínimo de 20 horas, co fin de que “o
alumnado adquira axilidade, destreza e desenvoltura no uso das
ferramentas dixitais e poida formular dúbidas sobre os coñecementos
obtidos”, sinalou a Deputación.