Dous colexios galegos, entre os gañadores da última edición do EducaRed
venres, 23 de xullo do 2010
O
Colexio Sanxurxo de Carricarte, de A Coruña, e o San Roque de Darbo, de
Pontevedra, veñen de obter, respectivamente, o segundo premio na modalidade Wiki da categoría III e o terceiro
premio en Experiencias Didácticas da
categoría II da undécima edición do concurso EducaRed, convocado pola Fundación
Telefónica.
O
traballo presentado polo equipo coruñés tiña por título A contorna dá Torre de Hercules
e foi liderado pola docente Natalia Roibás Blanco. O
xurado destacou del que "se trata
dunha interesante proposta para articular o estudo do patrimonio histórico e
monumental do ámbito próximo dos alumnos (a Torre de Hércules)”, ao que
engadiu que “se aprecia o traballo
colectivo dos alumnos que redactan os seus propios contidos e os organizan
axeitadamente".
Pola súa banda, o traballo do profesor pontevedrés Luís
Lagoa, titulado A aula virtual:
acceso aos recursos dá Rede
foi valorado polo xurado pola “importante
aposta do docente polo uso das TIC con alumnos de 2º de primaria”, ao ter
creado contidos multimedia que teñen a intención de substituír aos libros de
texto na área de Ciencias Sociais.
Nesta
edición, o concurso presentaba como principal novidade a intención da
organización por “converterse nunha
actividade de carácter internacional”, dirixida a profesores, profesoras,
alumnos e alumnas de calquera parte do mundo.
Este
carácter internacional reflectiuse na participación acadada este ano, posto que
en total concorreron ao certame 8.219 participantes (1.341 docentes e 6.878
estudantes) divididos en 2.169 equipos, procedentes de 19 países.
A temática
dos traballos premiados é moi variada. Destacan, en especial, os dedicados ás
matemáticas, ao cambio climático e a temas medioambientais, así como os dedicados
ao Camiño de Santiago (que son uns cantos), pola
coincidencia coa celebración do ano Santo.
O Certame Internacional EducaRed de
Fundación Telefónica busca promover o uso pedagóxico
das TIC, concienciar á comunidade educativa do valor potencial destas
tecnoloxías, poñer ao seu alcance iniciativas e actividades relacionadas con
estes obxectivos e recoñecer o esforzo do profesorado por introducir as TIC nos
procesos de ensino e aprendizaxe.
Para
participar no concurso, os alumnos e alumnas debían formar equipos, e coa axuda
dun profesor, realizar traballos multimedia relacionados coas materias do
currículo escolar do seu país. Nesta ocasión, as categorías de participación
viñan definidas pola idade dos alumnos, comezando dende os 3 anos. Os proxectos
debían presentarse no marco dalgunha das catro modalidades que propoñía o
Certame: Webs, Blogs e Wikis, ademais
dunha categoría denominada Experiencias
didácticas dirixida aos docentes, na
que os profesores participaban en solitario.
Os premios para os primeiros clasificados en cada unha das categorías consisten
nun netbook
para o docente responsable do grupo; un tablet PC ou un netbook
para os membros do equipo segundo categoría e unha lousa dixital e un canón proxector para o centro docente.