Humberto Bustince falará en Compostela sobre a revolución da intelixencia artificial na medicina

A AMTEGA e a AETG organizan o vindeiro 3 de outubro a conferencia A revolución da Intelixencia Artificial na medicina actual, que forma parte do programa de transferencia de coñecemento sobre novas tendencias tecnolóxicas dentro do convenio de colaboración asinado ente ambas entidades.
O relatorio terá lugar o próximo na Sala Eisenman da Cidade da Cultura ás 11:30 horas e será impartida polo catedrático de Ciencias da Computación e Intelixencia Artificial da Universidade Pública de Navarra e profesor honorario da University of Nottingham (Reino Unido), Humberto Bustince. Responsable e fundador do grupo de investigación da UPNA sobre Intelixencia artificial e Razoamento Aproximado (GIARA), Bustince é autor de máis de 250 artigos científicos e foi recoñecido este ano co Premio Nacional de Informática.
No evento presentarase o efecto que a Ciencia dos Datos e o Big Data están a ter na medicina e analizarase o novo concepto de medicina personalizada, ou de precisión, á que están dando orixe. Ademais, Humberto Bustince detallará proxectos que xa foron realizados e algunhas liñas futuras, sen esquecer as súas implicacións éticas e técnicas.
A xornada está dirixida tanto a profesionais do sector tecnolóxico como ao resto de sectores e, por suposto, á cidadanía en xeral e ás administracións públicas. As persoas interesadas deberán confirmar a súa asistencia por correo electrónico.