Intereconomía cesa as súas emisións na TDT de ámbito estatal
xoves, 13 de febreiro do 2014
Esta mañá moitos televidentes espertaron vendo como na canle
de TDT correspondente á Intereconomía aparecía un rótulo indicando “próximamente
nueva programación”, sen referencia ningunha á marca que anteriormente ocupaba
o espazo, dando a entender que podería desaparecer, o que finalmente
confírmase, aínda que dun xeito parcial, pois tras moitas dificultades
económicas a canle Intereconomía abandona a Televisión Dixital Terrestre de
ámbito estatal, mantendo só a súa presenza nos territorios nos que ten licenza (Comunidade
de Madrid e Comunidade Valenciana) e,
posiblemente, a través das plataformas de televisión de pagamento, no que pode
verse como unha volta ás orixes (Intereconomía naceu na televisión vía
satélite).
Intereconomía asegura estar a redefinir a súa estratexia, suspendendo
as emisións en aberto “dentro do marco de negociacións co Grupo Vocento”,
co que ten unhas débedas que poderían chegar aos 10 millóns de euros, o que
faría que a asociación entre as compañías fose insostible.
Neste últimos anos Intereconomía conseguiu facerse un nome na grella da TDT
polos seus polémicos contidos e por dirixirse a un público moi segmentado, pero
non conseguiu que tal éxito puidese traducirse en ingresos económicos,
acumulando perdas ano tras ano, o que levou a cadea a realizar unha drástica
redución de persoal e a adoptar medidas como a que coñecemos hoxe (o cesamento
de emisións na TDT de ámbito estatal) que non parecen ser abondas para superar
as importantes débedas que acumula todo o seu grupo de comunicación.