O CPEIG incidirá na ciberseguridade para a rapazada no marco da Mobile Week Coruña
xoves, 22 de novembro do 2018
Mergullados
de cheo nas
moitas e variadas actividades do Mobile Week Coruña, cómpre
(agora) dar conta das citas principais do programa, que se desenvolve
a cabalo entre Coruña, a súa área metropolitana e Santiago. Entre
elas cóntanse as organizadas polo Colexio Profesional de Enxeñaría
en Informática de Galicia (CPEIG). Máis polo miúdo, a entidade
profesional que preside Fernando Suárez, participará o sábado 24
de novembro con dúas xornadas sobre navegación segura en Internet e
un obradoiro de pilotaxe de vehículos aéreos non tripulados, drons.
O
CPEIG impartirá dúas xornadas do programa Navega con rumbo,
destinado a alumnado, docentes e familias. Celebraranse ás 11:00
horas e ás 17:00 horas no Centro Cívico Cidade Vella da Coruña
(rúa de Veeduría, 2). Por unha banda, o programa está encamiñado
directamente aos escolares para guialos cara unha navegación segura,
responsábel e útil en Internet e, deste xeito, “previr que sexan
vítimas de condutas como o ciberacoso”; e doutra banda, tamén fai
partícipes aos pais, nais e profesores das recomendacións precisas
e que, a súa vez, actúen como correa de transmisión.
Ademais,
o colexio organizará un obradoiro de pilotaxe de drons para nenos e
nenas, o sábado entre as 16:00 e as 18:00 horas en ExpoCoruña (rúa
Juana Capdevielle, 2). Iniciaranse a rapaces entre 8 e 16 anos no
mundo dos drons, creando un circuíto de habilidade onde poidan
practicar a pilotaxe destas aeronaves.
Finalmente,
o presidente do CPEIG, Fernando Suárez, e a experta en seguridade
dixital e membro da xunta directiva do CPEIG, Pilar Vila Avendaño,
participarán na mesa de debate sobre Ética e tecnoloxía, o
sábado no paraninfo da Universidade da Coruña (rúa da Maestranza,
9) ás 18:00 horas. Reflexionarase sobre as oportunidades e desafíos
que ofrecen as novas tecnoloxías, a Intelixencia artificial, o uso
de datos persoais, a información a gran escala (Big Data) e
os límites que poden formularse neste eido.