O Centro de Atención ao Contribuínte da Deputación de Pontevedra atendeu 2.537 emails máis que en 2014
xoves, 8 de outubro do 2015
A Deputación
de Pontevedra vén de facer reconto do acadado recentemente a través
do seu Centro de Atención ao Contribuínte. O estudo, que
abrangue a actividade de todo ano, certifica que o dito servizo
atendeu durante 2015 un total de 18.484 demandas de información. No
informe, e a falta dos datos que restan do que queda de ano, sinálase
que houbo 1.847 chamadas e 2.537 correos electrónicos máis que en
2014. O Centro de Atención ao Contribuínte insírese no servizo
ORAL da Deputación. O ORAL ten como obxectivo informar e asistir ao
contribuínte, así como xestionar, liquidar, inspeccionar e recadar
os tributos e demais ingresos públicos dos concellos e doutras
entidades públicas que o deleguen.
O Centro de Atención ao
Contribuínte do ORAL púxose en marcha, precisamente, para achegar a
administración á cidadanía, ofrecendo aos pontevedreses
información e asesoramento ao tempo que se lles aforran
“desprazamentos innecesarios”. Falamos pois dun servizo abeirado
ao que se coñece como Administración Electrónica.
En concreto, o centro
encárgase de facilitar información sobre dúbidas tributarias e
outros ingresos públicos (impostos sobre bens inmobles, actividades
económicas, vehículos, construcións, plusvalías, taxas sobre lixo
ou auga e multas de tráfico, entre outros), remisión de
documentación (solicitudes, cartas de pagamento, xustificantes de
pagamento de recibos ou liquidacións, etc.) e do asesoramento sobre
xestións tributarias (domiciliación de pagamentos, fraccionamentos
e actualización ou modificación de datos, entre outros).
Durante o ano 2014 o
Centro de Atención ao Contribuínte atendeu 16.647 chamadas. No que
levamos de 2015, sen contar cos datos dos últimos tres meses do ano,
atendeu 18.484 chamadas, é dicir, recibíronse 1.847 chamadas máis
que en 2014.
En canto ao correo
electrónico, recibiu 2.027 correos en 2014. Neste intre (comezos de
outubro) xa foron enviados e atendidos 2.537 correos máis que en
2014, é dicir, un total de 4.559 mails en 2015.
Por último, lembrar que
o servizo do ORAL da Deputación, co obxectivo “de facilitar as
xestións dos contribuíntes e aforrarlles viaxes”, conta tamén
cunha oficina virtual tributaria na que se poden realizar pagamentos
e solicitar duplicados de recibos, ver o detalle dos recibos
domiciliados, os valores de embargo ou a revisión de padróns.