O Meizu Zero inicia a súa campaña de micromecenado

O anuncio de que Meizu ía lanzar o primeiro smartphone sen fisuras ao mercado, que incluso prescindiría de porto de carga e de bandexa para a tarxeta SIM, semellaba unha simple demostración de músculo, xa que trataríase dun caso de innovación que non atendería a unha demanda recoñecida polo público, e finalmente semella que Meizu pensa iso mesmo, e non comercializará este móbil de xeito tradicional, senón que decidiu ofrecelo ao mundo a través dunha campaña de micromecenado en Indiegogo.
Deste xeito, quen queira facerse cun Meizu Zero con seu correspondente cargador sen fíos terá que achegar 1.299 dólares (1.131 euros) e agardar ao mes de abril para poder ter nas súas mans este curioso smartphone que pretende facer historia ao ser o primeiro sen buratos.
Este prezo elevado sería consecuencia de que estamos ante un móbil de edición moi limitada, e non dun produto de fabricación masiva, xa que as súas prestacións non se corresponden en absoluto cun prezo tan esaxerado xa que, por exemplo, o seu procesador será un Qualcomm Snapdragon 845, ou sexa, o propio dos smartphones de alta gama do ano pasado, en vez do seu sucesor, que previsiblemente incluirán a meirande parte dos móbiles de alta gama que cheguen ao mercado a partires da celebración do Mobile World Congress.
O Meizu Zero é un terminal minimalista, cun corpo cerámico sen buratos que envolve a súa pantalla curva OLED; prescinde dos seus botóns laterais físicos mediante a adopción de tecnoloxía sensible á presión que permitirá que os botóns de volume e acendido sexan virtuais (aínda que con certa respostas háptica); para que non contar con cable de carga non sexa un problema incluirá un cargador sen fíos de 18 watts que consegue cargar a batería a grande velocidade; tamén presume de contar con tecnoloxía USB 3.0 sen fíos, para facilitar a transferencia de datos de xeito veloz entre o móbil e ordenadores persoais; carece das perforacións propias dos altofalantes ao optar pola tecnoloxía mSound 2.0 baixo a propia pantalla do dispositivo (que permite aproveitar a pantalla a xeito de altofalante e auricular para chamadas); a carencia de fisuras facilita a súa resistencia ao po e á auga (IP68); para non ter bandexa para tarxetas SIM aposta polas eSIM (ou SIM virtuais); o lector de pegadas dixitais intégrao na pantalla; e chegará coa capa de personalización Flyme 7, propia de Meizu.
Temos así que o que outros fabricantes presentan como produtos conceptuais, Meizu levarao ao mercado, aínda que de xeito limitado. Poderase comprobar así se estamos ante tecnoloxías polas que pague a pena apostar, e que poderían supor un paso máis até un hardware con deseño irrelevante, xa que cada vez son menos os elementos que podemos ver dun móbil aparte da súa pantalla.