Últimos días para presentarmos candidatura aos premios empresariais da Deputación da Coruña
xoves, 21 de febreiro do 2019
Esta
semana entrou na recta final o prazo para presentarmos candidaturas á
terceira edición do Premio Provincial á Mellor Iniciativa
Empresarial (PEL-EPR Premio), convocado pola Deputación da
Coruña co obxectivo de recoñecer e mostrar o importante empuxe
innovador do tecido produtivo provincial. Segundo concreta a entidade
coruñesa, o prazo para achegar propostas rematará o día 28 de
febreiro ás 14.00 horas.
O
certame, como lembraremos, inclúese ao abeiro das iniciativas de
crecemento do Plan de Emprego Local (PEL) e ten o obxectivo detallado
de “promover o labor realizado polas pequenas e medianas empresas,
microempresas, autónomos/as, concellos e asociacións empresariais
da provincia da Coruña, así como contribuír ao crecemento e
desenvolvemento das mesmas”.
Concederanse
un total de cinco galardóns por un importe total de 75.000 euros
outorgándose 15.000 euros a cada unha das categorías.
Estas
son as modalidades deste ano (que inclúen tres novas categorías con
respecto ao ano pasado: premio á mellor iniciativa empresarial
xeradora de emprego, premio ao concello promotor do emprego de
calidade e premio á mellor asociación empresarial.
·
Primeira categoría. Premio á mellor iniciativa empresarial nova.
Para pequenas e medianas empresas, microempresas e autónomos/as cuxa
data de constitución (inscrición no rexistro público
correspondente) e data de alta censual teñan una antigüidade máxima
dun ano.
·
Segunda categoría. Premio á mellor iniciativa empresarial
consolidada. Para pequenas e medianas empresas, microempresas e
autónomos/as cuxa data de constitución (inscrición no rexistro
público correspondente) e data de alta censual teñan una
antigüidade mínima de 5 anos.
·
Terceira categoría. Premio á mellor iniciativa empresarial xeradora
de emprego. Para pequenas e medianas empresas, microempresas e
autónomos/as que contribúan á creación de emprego e,
consecuentemente, ao desenvolvemento socioeconómico e a fixación da
poboación.
·
Cuarta categoría. Premio ao concello promotor do emprego de
calidade. Para concellos de menos de 20.000 habitantes da provincia
que impulsen a iniciativa empresarial e o emprendemento, promovan a
xeración de emprego de calidade e contribúan á fixación da
poboación.
·
Quinta categoría. Premio á mellor asociación empresarial. Para
asociacións, agrupacións, federacións e confederacións de
empresarios/as da provincia da Coruña.
A
participación só poderá realizarse mediante a presentación
telemática da documentación, a través da plataforma Subtel. O
prazo de achega de candidaturas ficará aberto até o 28 de febreiro
de 2019 ás 14.00 horas e o fallo darase a coñecer durante o
primeiro semestre de 2019.
Podemos
consultar as bases e a convocatoria publicadas no BOP, así como
descargar os anexos a presentar, na plataforma Subtel e na páxina
web do Premio provincial á mellor iniciativa empresarial:
https://emprego.dacoruna.gal/lineas/lina-2-pel-emprende/premio-provincial-mellor-iniciativa-empresarial/.