Xesol ultimará o seu sistema de asistencia á condución coa axuda de 100 testers
venres, 10 de xaneiro do 2020
A
empresa galega Xesol
Innovation, centrada no desenvolvemento de tecnoloxías
revolucionarias para o sector da mobilidade intelixente e os
vehículos autónomos e conectados (tecnoloxías que redunden en
maiores sustentabilidade, eficacia, capacidade de resposta e
seguridade), vén de lanzar un convite para acadar a participación
dun centenar persoas e poder así, coa axuda das voluntarias e os
voluntarios, comprobar o funcionamento do seu sistema avanzado de
axuda á condución integrado. As
probas realizaranse este mes de febreiro na Tecnópole.
Este
dispositivo de asistencia foi
presentado a nivel mundial no Parque Tecnolóxico de Galicia en
decembro de 2016 e dende entón, segundo sinalan fontes do
completo empresarial innovador de San Cibrao das Viñas (Ourense),
“foi perfeccionado de forma continuada”. O obxectivo da empresa
Xesol é obter “a máxima retroacción” por parte dun grupo de
usuarios de perfís variados para “coñecer a súa experiencia co
asistente de condución intelixente”.
O
sistema avanzado de asistencia á condución (ADAS) desenvolvido por
Xesol Innovación forma parte do proxecto SmartCars que a start-up
galega leva desenvolvendo dende o seu nacemento en 2012.
As
persoas interesadas poden rexistrarse como testers na ligazón
https://lnkd.in/d6sphnb.
Máis
detalles do sistema
O
dispositivo perfeccionado por Xesol pode ser implantado en calquera
vehículo fabricado a partir do ano 2000 sendo, en palabras dos seus
creadores, “moito máis preciso sobre os sistemas xa existentes”,
pois basea a súa tecnoloxía de detección na visión artificial (en
troques de infravermellos ou radares) co maior número de ángulos de
visión aumentada do mercado (tres cámaras de visión artificial),
alén de considerarse intelixente porque achega un sistema de
aprendizaxe rápida.
O sistema foi deseñado para ser instalado
de xeito sinxelo en calquera coche xa en uso, á marxe da gama á que
pertenza, o que fai que a condución avanzada estea ao alcance de
calquera usuario.