A ciberseguridade, con 349 centros, foi a gran protagonista do plan estatal de convivencia escolar en Galicia

Este 17 de xaneiro celebrouse a reunión da Comisión Autonómica do Plan de Convivencia e Mellora da Seguridade Escolar na que se analizaron os resultados do primeiro trimestre deste curso académico. A xuntanza estivo presidida polo delegado do Goberno en Galicia, Pedro Blanco, quen salientou que neste primeiro trimestre 3 de cada 4 centros educativos de Galicia participaron neste programa, o que significa que 770 colexios e institutos de Galicia acolleron actividades (moitas delas centradas no ámbito dixital, concretamente na ciberseguridade e en como acadar navegacións útiles e protexidas, accións que acadaron a cifra de 349 centros), neste primeiros tres meses de curso.
Os equipos especializados de Policía Nacional e Garda Civil desenvolveron neste centros 1.206 actividades de formación e prevención. Nelas participaron máis de 37.000 membros da comunidade educativa, dos que 33.500 foron alumnos e alumnas, ademais do profesorado, equipos directivos, pais, nais e titores.
O delegado do Goberno explicou que neste primeiro trimestre lectivo a metade das charlas abordaron a ciberseguridade, especialmente a protección de nenos e nenas nas redes sociais, e o acoso escolar. “Soben tamén as peticións en actividades relacionadas coas adiccións, incluíndo substancias, xogos e tecnoloxía”, dixo, engadindo que “estas temáticas son un mapa das preocupacións da comunidade educativa de Galicia”.
O Plan de Convivencia Escolar contempla tamén a vixilancia activa dos centros escolares por parte das forzas e corpos de seguridade. Pedro Blanco informou que neste primeiro trimestre realizáronse máis de 4.000 vixilancias en escolas e institutos. Como resultado desta actividade, Policía Nacional e Garda Civil desactivaron tres puntos de venda de drogas, un na Coruña e dous, en Lugo.
Na reunión participaron tamén o director de Educación da Delegación do Goberno en Galicia, Xosé Lois García Carballido, o xeneral xefe da Garda Civil en Galicia e o xefe superior de Policía, as responsábeis das unidades contra a Violencia sobre a Muller do Goberno, a subdirectora xeral de Ordenación Educativa da Xunta e o secretario xeral da Delegación do Goberno, entre outros asistentes.
O delegado destacou que estas reunións tamén “son un recoñecemento aos equipos especializados da Garda Civil e á Policía Nacional nas catro provincias, así como á inspección educativa da Xunta, ao persoal da área de Inspección da Delegación do Goberno, ás subdelegacións e aos centros escolares”.