A feira virtual OnEJob2021 achega unha manchea de ofertas de traballo de perfís tecnolóxicos
xoves, 28 de outubro do 2021
Preto
de 1.300 persoas participan esta semana (28 e 29 de outubro) na
segunda edición da Feira
Virtual de Emprego OnEJob2021, unha cita na que concorren arredor
de cen empresas achegando ao alumnado dos tres campus da UVigo (e os
de Tras Os Montes e Alto Douro, en Portugal) máis de 200 ofertas de
emprego “nas que se buscan candidaturas para sectores moi diversos
e que requiren competencias moi variadas”, tal e como destaca a
directora da Área de Emprego e Emprendemento da Universidade de
Vigo, Maruxa Álvarez.
Na
cita teñen un papel especialmente sobranceiro as seguintes áreas
avanzadas de actividade: enerxías sustentábeis, análise de datos
(Big Data), desenvolvemento de software,
xestión de proxectos de innovación, xestión de recursos humanos,
especialista en ecommerce, administración de empresas,
Intelixencia Artificial, biotecnoloxía, microbioloxía e idiomas...
Segundo
informa
a UVigo, a feira é unha oportunidade para as empresas da Eurorrexión
Galicia-Norte de Portugal e, en xeral, de toda Europa, de coñecer e
contactar con profesionais altamente cualificados de moi distintos
perfís.
Desta
volta, das 1.260 persoas inscritas, 266 son de España, 223 de
Portugal e o resto están repartidas entre diferentes países da
Unión Europea. Hai perfís, tanto de idade como de formación, moi
distintos, pero case a metade sitúanse na franxa de idade entre 25 e
34 anos.
Para
os empregadores “este evento é unha oportunidade de publicar as
súas oportunidades de traballo e prácticas no seu sitio web, facer
presentacións en vivo sobre a súa empresa e necesidades de
contratación e tamén realizar servizos de programación de
entrevistas e asesoramento personalizado”, explica a UVigo.
No
caso das persoas que buscan emprego, “poderán seleccionar e
postularse para traballos que coincidan co seu perfil, pórse en
contacto cos empregadores e tamén programar entrevistas de
recrutamento, tanto durante como nos días posteriores á celebración
da feira”. Tamén poderán beneficiarse dun programa en vivo de
presentacións de empresas e obradoiros temáticos, actividades que
cobren unha ampla gama de temas, desde a busca de emprego e a
mobilidade ata fomento do espírito emprendedor e oportunidades de
investigación.
A
Feira Virtual de Emprego OnEJob2021 é herdeira da Finde.U, a
tradicional feira de emprego universitario que viñan co-organizando
desde hai anos as universidades de Vigo, Porto e Tras Os Montes e
Alto Douro. Agora, xa con formato integramente virtual, a nova feira
está co-organizada polas universidades de Vigo e Tras Os Montes e
Alto Douro xunto coa rede Eures, o servizo público nacional de
emprego de Portugal (IEFP) e a Xunta de Galicia.