App Ciudad fornece un novo servizo de información útil sobre accesibilidade urbana
venres, 14 de novembro do 2014
App
Ciudad é unha aplicación que, como o seu propio nome indica,
fornece ao usuario urbano (usuario de dispositivos móbiles e dos
servizos e infraestruturas das cidades) de guías personalizadas para
o coñecemento da cidade na que se atopa. Segundo veñen de informar
os responsábeis da plataforma, esta ampliou o seu radio de acción
cunha nova sección onde ofrece datos de valor acerca dos accesos. Ou
sexa, sobre aqueles locais, establecementos ou lugares que están
plenamente adaptados para as persoas con diversidades funcionais ou
motrices. O obxectivo, polo tanto, é facilitar de forma diaria e
continua a máxima información de utilidade sobre aquilo que se
achega para toda a cidadanía, sen barreiras nin discriminacións.
Segundo fan saber os
responsábeis destas tecnoloxías, se ben é certo que para moitos de
nós as cidades non achegan grandes dificultades para movérmonos dun
recanto a outro, non cabe dúbida de que para unha boa parte da
poboación estes hábitos “poden ser un desafío, mesmo en ocasións
un suplicio”. E engaden: “As obras, beirarrúas rotas, accesos
aos transportes públicos, ausencia de ramplas ou prazas de
aparcamento adaptadas, todo iso convértese nunha barreira de
accesibilidade para unha persoa con diversidades funcionais físicas”.
Co obxectivo de facilitar o seu día a día, App Ciudad, lanzou o
devandito servizo de accesibilidade. Nesta sección, como dixemos, as
aplicacións da plataforma recollen información sobre aqueles
establecementos que dispoñen de acceso para cadeiras de roda. Tamén
poderemos ver se teñen prazas de aparcamento para minusválidos.
Lembrar que a día de
hoxe, App Ciudad xa conta con máis de 30 puntos nacionais e
internacionais nos que esta franquía en liña está presente, entre
eles: Granada, Toledo, Barcelona, Santiago, A Coruña ou Eivissa.
“Tras case 4 anos en liña”, engaden, “estas aplicacións
sufriron diversas melloras e incluído novos servizos como este
pensado para as persoas minusválidas; grazas a esta sección
poderase saber onde hai accesos, ramplas, prazas de aparcadoiro para
minusválidos a tempo real e outros servizos adicionais”. Arestora,
calculan, máis de 600.000 persoas xa teñen na súa tableta ou
smartphone unha das aplicacións de App Ciudad.