Bota a andar o proxecto piloto, Comunidades Rurais virtuais para a educación na nube
mércores, 13 de abril do 2011
- Javier Guerra destacou que o proxecto piloto está en sintonía co Plan I2=C</A>
Botando man das
vantaxes que ofrece a tecnoloxía de computación na nube, sobre todo á hora de
rachar distancias e facilitar o intercambio de contidos dende calquera punto de
país, o Centro de Supercomputación de Galicia (CESGA) puxo a andar o proxecto
de Cloud Computing adaptado ás
necesidades das escolas rurais, Comunidades
Rurais virtuais para a educación na nube, que se implantou inicialmente no
Colexio Rural Agrupoado (CRA) de Boqueixón Vedra.
Este proxecto, que
en palabras do conselleiro de Educación, Xesús Vázquez Abad, “é de vital importancia e magnitude, foi
quen de atraer o investimento de Silicon Valley, xunto a outras dúas
iniciativas localizadas en Estados Unidos e Asia”.
Vázquez Abad engadiu
que Educación “está a estudar a
posibilidade de integrar no proxecto Abalar as potencialidades desta iniciativa”,
e engadiu que, “unha vez confirmadas
as potencialidades deste proxecto e os seus beneficios para combater a dispersión
no ensino rural galego, Educación tratará de implicar aos Concellos galegos nos
que existan CRAs, co fin de ampliar este proxecto innovador”.
- O conselleiro de Educación e Ordenación Universitaria na presentación do proxecto
Na actualidade,
o proxecto de Cloud Computing ideado
polo CESGA está a funcionar nas 7 escolas que compoñen o CRA Boqueixón Vedra e
xunto coa Universidade de Idaho e unha universidade de Taiwan, conforman os 3
únicos centros do mundo que foron financiados por Hewlett Packar para
desenvolver os seus proxectos piloto neste eido.
O conselleiro
de Economía e Industria, Javier Guerra, que tamén asistiu á presentación do
proxecto piloto, destacou que Computación
na Nube “está en sintonía coa folla
de ruta marcada polo novo Plan Galego de Investigación, Innovación e Crecemento
2011-2015 (i2C)”, e neste senso explicou que “o Goberno de Xunta aposta por
un modelo de investigación aplicada, competitiva e colaborativa; capaz de xerar
benestar e crecemento; un modelo no que sempre terán cabida proxectos de alto
valor engadido”.
Grazas á tecnoloxía
de computación na nube os profesores e alumnos das 7 escolas de educación
primaria e infantil que compoñen o CRA galego, poden comunicarse entre si,
traballar e facer actividades escolares de forma conxunta sen ter que
desprazarse, a través da Rede. Para iso contan coa tecnoloxía cloud, en nube, que permite acceder a
unha serie de servizos informáticos e responder ás necesidades do usuario de
forma flexible e personalizada, a través de internet e sen necesidade da axuda
de expertos informáticos.
Cunha solución
de software libre e código aberto os usuarios traballan nunha plataforma
sinxela que é axeitada tanto para o profesorado como para os estudantes e as
súas familias, grazas á que non é necesario contar cos recursos e programas
instalados en cada ordenador, senón que se pode contar cos materiais didácticos
e recursos de aula nun espazo común, dispoñible dende calquera ordenador ou
incluso móbil, conectado a Internet, para todos os membros da comunidade
educativa.
Deste xeito
ademais redúcense ao mínimo as dificultades técnicas, limítanse os custos de
licencias de software, e créase unha contorna de traballo virtual a través
dunha única aplicación lixeira,
estruturada en varios niveis de acceso, segundo o perfil do usuario
final.