Emprendedores galegos dan a coñecer as súas experiencias de éxito botando man do crowdfunding
venres, 3 de outubro do 2014
Este xoves celebrouse no
Pazo de Mariñán, da man da
Factoría de Innovación da Coruña, unha actividade divulgativa
sobre métodos innovadores de financiamento, alternativos, colectivos
e cooperativos. Falamos da xornada Crowdfunding ou a arte de
innovar cooperando, unha sesión que serviu para amosar recursos
para contrarrestar a crise e unha das súas principais consecuencias
para as empresas: a falta de crédito bancario. Trátase, fíxose
saber, de aplicar as técnicas tradicionais de mecenado á Rede, ao
tempo que se adoptan fórmulas de traballo colectivo. Estas
metodoloxías de investimento e financiamento resultan de especial
interese para start-ups e PEME, explicouse.
Na xornada, na que
participaron preto dunha vintena de empresarios e emprendedores,
achegouse unha cifra concreta das transaccións totais de
financiamento colectivo en España levadas a cabo durante o ano
pasado: 19 millóns de euros, segundo datos da Asociación Española
de Crowdfunding. A Factoría de Innovación da Coruña quixo dar a
coñecer a empresarios da provincia as claves deste novo modelo de
microfinanciamento que, segundo explicou, “está a revolucionar o
mundo dos emprendedores”.
Meténdonos no miolo
mesmo da sesión, dicir que contou coas intervencións de Diego
Calvo, representante da Factoría de Innovación da Coruña; e
Fernando Prieto, cofundador de Start Your Business Consulting. Os
relatores informaron que “o crowdfunding
permite aos emprendedores dar a coñecer o seu proxecto a través de
Internet e acadar fondos para o seu desenvolvemento mediante pequenas
achegas de diversos investidores”. Logo de amosar diversos casos de
éxito e explicar polo miúdo o funcionamento deste novo modelo de
financiamento e as plataformas existentes a nivel mundial, os
relatores salientaron que estas metodoloxías achegan recursos
económicos ao tempo que “reducen riscos, dan maior visibilidade ás
iniciativas e permite realizar un test de mercado realmente fiábel”.
A actividade pechouse cunha mesa redonda na que María Jover, socia
de Natural Healing; e Ramón Corujo, director de I+D de Otro Enfoque,
compartiron a súa experiencia á hora de sacar adiante as súas
iniciativas innovadoras a través da cooperación.