Ineo organiza o día 14 un encontro para reivindicar o papel do muller no sector TIC
luns, 5 de decembro do 2011
A asociación Ineo organiza a vindeira semana un
encontro para reivindicar, fomentar e promover o papel da muller no noso
tecido produtivo tecnolóxico-dixital. A xuntanza, programada en colaboración
con BIC Galicia e APD, desenvolverase o mércores 14 co seguinte epígrafe: Emprender e dirixir en feminino. A muller
emprendedora e directiva no escenario 2.0. O miolo do evento será unha
longa e completa serie de exposicións e casos prácticos, persoais, de propostas
femininas de éxito e de métodos para traballar a prol dun panorama máis
igualitario. As participantes no evento, expertas na cuestión da actividade
empresarial TIC, tamén achegarán recursos e consellos para conseguirmos a
conciliación da vida laboral e familiar dende o liderado empresarial.
Xa nun plano máis específico, presentarase no
foro a Rede de Mentoras, un instrumento impulsado por Ineo e máis BIC Galicia
co obxectivo de promover a creación de firmas do sector con mulleres á súa
fronte. O foro desenvolverase no salón de grados da Escola de Enxeñaría de
Telecomunicación da Universidade de Vigo, a partir das 9.30 horas da mañá. A
asistencia será de balde, previa inscrición vía telefónica ou e-mail. O foro dará comezo coa intervención de Susana
López Abella, secretaria xeral de Igualdade, e Jorge Cebreiros, presidente de Ineo.
Ao longo do evento participarán Edita de Lorenzo,
directora da Escola de Enxeñaría de Telecomunicación, Patricia Araque,
presidenta e cofundadora de Elas 2.0, Pilar García-Ceballos Zúñiga, directora
xeral de INSA, Lourdes Guerra (Ayco Internet), Lourdes Sánchez (Ultreia
Comunicacións), Luz Castro (Imaxin Software), Lucía Gregorio (directora xeral
de Ineo), Maite Cancelo (directora xeral de BIC Galicia).