Margarita Álvarez amosa en FEUGA as claves para recoñecer dende a nosa empresa os talentos ocultos
xoves, 21 de decembro do 2023
A
Fundación FEUGA organizou
este mércores 20 de decembro, na súa sede de Santiago, un encontro
con Margarita Álvarez, considerada unha das 50 mulleres máis
referenciais do ámbito español, que reflexionou sobre o talento
como clave da supervivencia das organizacións poñendo o foco nas
cousas que poden facer as empresas para atopar o talento en potencia,
ás veces oculto, que teñen ao alcance da man.
Segundo
fixo saber, “o 73% dos directivos aseguran que non atopan o talento
que buscan, un dato que evidencia que non estamos a adecuar a oferta
á demanda”. E engadiu: “As regras de xogo cambiaron, as novas
xeracións buscan cousas novas, priorizan aspectos como o benestar
emocional e mental. Os colaboradores non queren que lles tratemos
como un empregado senón como unha persoa. Fomentar o crecemento
persoal, o recoñecemento e o benestar emocional é fundamental para
enganchar o talento nas organizacións”.
A do
anterior parágrafo é a mensaxe que Margarita Álvarez, empresaria e
consultor, quixo lanzar no encontro organizado por Fundación Empresa
Universidade Galega. Un evento no que estiveron presentes, o director
xeneral de FEUGA, Javier Pereiro, e representantes do mundo
universitario e empresarial de Galicia.
Durante
a súa exposición, baixo o epígrafe E se o talento oculto fose a
clave da supervivencia das organizacións?, Margarita Álvarez
destacou que “o máis caro é buscar o talento fóra, pero atopalo
dentro é máis complexo”. Nese sentido deu algunhas pautas para
localizar e axudar a desenvolver ese talento oculto. Na súa opinión,
para “enganchar” aos traballadores á empresa e evitar o que se
coñece como “despedimento interior” hai unha serie de elementos
fundamentais. Un deles é o crecemento. “A xente ten que sentir que
é mellor profesional, que está mellor preparado e que a empresa lle
axuda nese proceso de medre”, explica. Outras claves son o
recoñecemento, o fomento das relacións, ademais dunha boa xestión
das emocións. “É fundamental coidar do benestar emocional e
mental. A xente pídenos que os tratemos como persoas e como persoas
temos emocións que hai que coidar dentro da compañía”.
A
empresaria e consultora, fixo especial fincapé en poñer sobre a
mesa o talento oculto das organizacións que pasa por coñecer as
capacidades de cada persoa, “algo que non sempre é doado”, dixo,
engadindo que “a receita para conseguilo pasa por promover a
confianza e a apertura da empresa compartindo máis información,
mesturar equipos, permitir a cultura do erro, o mentoring, os
incentivos, a unidade e a confianza.
Na
súa opinión, “para que ese talento oculto, que é máis barato
aínda que máis complexo, abrolle, apoie e sume é tremendamente
importante que haxa cancha de actuación, que non teñamos tantas
burocracias, que axudemos aos profesionais a medrar, que recoñezamos
os seus méritos, que recoñezamos á persoa e que traballemos os
vínculos emocionais que son os que fan que alguén sinta
orgulloso
de traballar nunha empresa, nun equipo, nun proxecto ou nunha
organización”, concluíu.
O
encontro foi presentado polo director xeneral de FEUGA, Javier
Pereiro, que abriu o acto destacando que, precisamente, o impulso ao
talento é un dos piares fundamentais da Fundación”. Un eixo que
se reforzou coa incorporación do portal de emprego da entidade que
conta xa con 10.000 usuarios e que “neste último ano xestionou
máis de 500 ofertas de emprego”. Javier Pereiro resaltou que “a
captación e o desenvolvemento de talento son cuestións cada vez
máis complexas” nun momento no que as empresas e organizacións
enfróntanse “cada vez a unha maior incerteza” e necesitan
líderes” capaces de levar a cabo os cambios.
Perfil
de Margarita Álvarez
Margarita
Álvarez foi nomeada pola revista Forbes como unha das 50
mulleres máis poderosas de España e foi elixida entre as 10
directivas máis influentes do país durante tres anos consecutivos.
A súa carreira sempre estivo ligada a postos de alta dirección en
multinacionais. É directora de Human Age Institute, unha
institución dedicada á xestión da transformación social para
conseguir empresas máis sustentábeis. Ademais, é directora
executiva (CEO) de Working for Happines, unha consultora que traballa
con grandes empresas en áreas de liderado, recursos humanos,
comunicación, mercadotecnia, transformación reputacional e
sustentabilidade. Traballou durante 15 anos en Coca-Cola,
desempeñando varios cargos, entre eles o de presidenta do Instituto
da Felicidade. Foi tamén directora de Marketing e Comunicación de
Iberia e Latam no Grupo Adecco. Como responsábel de Thought
Leadership no mesmo grupo, liderou a estratexia de reputación en 62
países. É, así mesmo, fundadora do Observatorio de Innovación no
Emprego e a Educación (OIEE).